No.4324/2021-2022
Aizawl, 18th March, 2022 : Human Resource Development Board Vice Chairman Pu L. Thangmawia, MLA chuan vawiin khan poetry lehkhabu ‘Rose Par Eng’ tih chu a tlangzarh.
He lehkhabu ‘Rose Par Eng’ hi Masi-a Chhakchhuak-in hla chi hrang hrang 102 zet a dahkhawmna a ni a. Tlangzarh paha a thusawinaah L.Thangmawia chuan, thangthar zingah poetry phuah thiam leh hla phuah lama tui an thahnem ta hle nia a hriat thu sawiin, ‘Hla chu hnam inpumkhatna atan leh inunauna tha siam theitu a ni a, helam zawnga hla tam zawk in phuah zel ka beisei a ni,’ a ti.
A sawi zelnaah L.Thangmawia chuan, thu leh hla hmanga tawng tihhmasawn zel a tul thu te, chumi tur chuan Mizoram sorkar-in Mizo Language Development Board (MLB) din tura hma a lak mek thu te a sawi a. MLB chu Mizo hnam inpumkhatna tur hmanrua leh Mizo tawng tihhmasawnna tur pawimawh tak a nih a beisei thu sawiin, ‘Mizo Poetry Society-in thangthar hla phuahthiamte huikhawm a, an tana inpuanchhuahna tur hmun an siamsak zel thei te hi a lawmawm a, Mizo Language Development Board din tur tan pawh thil tangkai tak a la nih zel ka beisei a ni,’ a ti bawk.
Lehkhabu tlangzarh inkhawm hi Lalremruati Ngente, Asst. Professor, Govt. Hrangbana College-in a kaihruai a; Lalmalsawmi Renthlei, Associate Professor, Govt. Johnson College chuan hunserh hmangin Dr. H.Laldinmawia, Asst. Professor, Pachhunga University College chuan lehkhabu hi a thlir lawk a. Lehkhabu tlangzarh taka hla thenkhat chu chham chhuah a ni a, a then chu zaithiamten an sa bawk a ni.
He lehkhabu ziaktu Masi-a Chhakchhuak hi zirtirtu hna thawk mek a ni a, Mizo Poetry Society member niin ‘Rose Par Eng’ tih hi a lehkhabu tihchhuah hmasak ber a ni a. He lehkhabu hi phek 118 a chhah niin Rs. 90 man a ni.
Attachment
- Loading attachment...
