No.2393/2021-2022

Mimkut thla ni 29, 2021: India ramin zalenna a hmuh kum 75-na puala sawrkar laipui ruahmanna Azadi Ka Amrit Mahotsav (AKAM) chu Urban Development & Poverty Alleviation (UD&PA) Lawngtlai District pawhin Lawngtlai khawpuiah kalpuiin, Swachh Bharat Mission (Urban) hma lakna hnuaiah faina beihpui thlak mek a ni.

AKAM Week hman mekah hian vawiin khan Lawngtlai DC Conference Hall-ah a bul atanga bawlhhlawh thliar hran (source segregation) chungchangah khawpui chhunga village council (VC), tualchhung faina palai (local ambassador) leh DAY-NULM hnuaia Self Help Group te hnenah zirtirna pek a ni a. Inchhungkhur atanga bawlhhlawh tawih thei leh tawih thei lo thliar hran a, bawlhhlawh bawm hrana paih sa a pawimawh thu zir ho niin, chumi tihlawhtling tura hma lakna tur hrang hrangte sawi ho a ni.

AKAM hma lakna peng pakhat atana UD&PA Lawngtlai District-in faina leh bawlhhlawh thliar hran chungchang mipui zirtirna puanzar tur an ruahman chu vawiin vek khan Lawngtlai khawpui chhunga veng hrang hrangah mobile van hmanga tlan kualin, mipui hriat turin puanzar a ni bawk.