No.2392/2021-2022

Aizawl the 29th September, 2021: Vawiin chawhnu dar 1 khan Khawzawl District chhunga Faina Hapta 2021, October ni 2 atanga ni 8 chhunga hman dan tur leh October thla chhunga Clean India Programme kalpui dan tur ngaihtuahin District Sanitation Task Force chu an Chairman Pu C.C. Lalchhuangkima, District Bawrhsap ni bawk hovin DC Conference Hall-ah an thukhawm.

He hunah hian Pu Ngurthansanga, District Urban Development Officer (DUDO) Khawzawl chuan Mizoram puma faina hapta hman dan tur UD&PA Directorate-in a duansa chu a sawifiah hmasa a. Hun hman dan tur duan lawk zulzuia Khawzawl District-a faina hapta hman dan tur District Sanitation Task Force thukhawm chuan a ruahman nghal a. Faina hapta hawnna chu October ni 2 (Inrinni) zing dar 7:45 hian Covid -19 hrileng laka invenna tura inkaihhruainate tha taka zawm chungin sawm bikte nen Zaingen YMA Hall-ah neih ni se tih a ni a, hapta kharna hun chu October ni 8 (Zirtawpni) chawhma dar 11 hian DC Conference Hall-ah neih ni se tih a ni.

Meeting-ah hian Sawrkar laipui Ministry Of Youth Affairs & Sports atanga lehkha dawn bawhzuiin October thla puma India ram faina beihpuithlak ‘Clean India Programme’ hman dan tur rel a ni bawk a. Clean India Programme hlawhtlaing taka kalpui a nih theih nan Pu K.Lalkulhpuia, NSS Programme Officer, Govt. Khawzawl College chu Nodal Officer atan ruat a ni a. October ni 1 atanga ni 31 chhunga inhnatlan chhawk dan tur duan niin, Single Use Plastic zawn khawm chu he programme hnuaia tum bulpui ber a ni dawn a. October thla tluana plastic chhia chharkhawmte chu a tawp ni October ni 31 ah a zat teh chhuah vek a ni ang a, chharkhawm zat chu mumal taka chhinchhiahin a thehluhna tur form siamsa hmangin Sawrkar laipui Ministry Of Youth Affairs & Sports hnenah thehluh a ni ang.