432/2023-2024

2023 Ṭomir thla ni 12: Vawiin khan Lawngtlai District-a sawrkar department hrang hrangte chu Lawngtlai Bawrhsap Pu David Lalthantluanga hovin Lawngtlai DC Conference Hall-ah an ṭhu khawm a. Article 275(1) kal tlanga District chhung hmasawnna hna thawh tur ruahmanna, District Plan 2023-24 siam tur chungchang an sawi ho.

Pu David Lalthantluanga chuan department hrang hrangin scheme awm sa aṭanga kan thawh theih baka District leh mipuite hmasawnna tur hna thawh nan hman a nih theih nan Article 275(1) hnuaia District Plan ruahmanna chu siam thiam a ṭul tih a sawi a. Department-te chu District Plan atan ruahmanna ṭha leh felfai tak, a taka hlawhtlinpui ngei tur siam turin a chah a ni.

He hunah hian Lawngtlai DRDO Project Director Pi Marilyn Rualzakhumthangi chuan kum hmasa lama Article 275(1) hnuaia Lawngtlai District-in sum a dawn tawh dan report pein, District Plan 2023-24 chungchanga hriat tur pawimawhte a sawi fiah a. District Plan siam tur chungchanga thil pawimawh hrang hrang sawi ho zui a ni.

India ram Danpui (Constitution) Article 275(1) beh chhana ram chhunga tribal mipuite tana hmasawnna tur hna thawhna (tribal development programme) Sawrkar Laipui Ministry of Tribal Affairs hnuaia ruahmanah kum 2021-22 sawrkar kum chhung khan Lawngtlai District chuan ₹ nuai 217 a dawng a. Kum 2022-23 atan ₹ nuai 338 ruahmanna theh luh a ni bawk a. Lawngtlai District aṭanga District Plan atan hmasawnna kawng hrang hrang education, health, water supply, agriculture & allied, commerce & industries, administrative structure, skill development, infrastructure development leh sports lam atan te ruahmanna siam ṭhin niin, eng emaw zat chu Sawrkar Laipui aṭanga pawmpuina hmuh leh hna thawh tawh a ni a. Project pawm tawh sa, a tahtawla sum dawn beiseina eng emaw zat a awm bawk.

Vawiin ṭhut khawmah hian line department hrang hrang aṭanga hna thawh tur rawtna leh ruahmanna theh lut duh tan hun hawn a ni a. Chu'ng department hrang hrang aṭanga ruahmannate chu State Level Committee-ah pawmpui tura theh luh leh a ni ang.