433/2023-2024

Aizawl, 12.05.2023: Chief Minister Pu Zoramthanga chuan vawiin khan Mizoram Police Service Association (MPSA) General Conference tum 13-na, GS Arya Mess, PHQ a neih chu khuallian niin a hmanpui. Home Minister Pu Lalchamliana chu khualzahawm a ni.

Chief Minister chuan police te'n inpe taka an hna an thawh naah lawmthu sawiin, Mizoramin hun khirh tak tak a tawn - covid hripui leng te, ramri buaina leh kawng hrang hrangah police te chuan tlin taka an hna an hlenchhuak thin chu chhuanawm a ti a. Police department leh department dangah pawh thawktu indaihlohna leh inthuamthat mamawhna an neih a hriatpui thu sawiin, sawrkar sum dinhmun in a zir tawkloh avanga a vaia tihhlawhlin theih rih a loh mahse ngaihtuah zui zel an nih tur thu a sawi a. Chief Minister chuan hripui leng avanga sawrkar laipui atanga sum kan hmuh tur, kan budget innghahna chu tam tak kan hmuh tak loh avanga harsatna kan tawh dan te, hrileng boruak a ziaawm hnu ah pawh chu chu sum hloh chu a nih chuan si loh avanga sum indaihlohna chuan a chhunzawm chhoh tak zel dan a sawifiah a. Chuti chung chuan sawrkar chuan kawng hrang hrangin sum harsatna sukiang tura hma a lak chhoh thu te, resource mobilization committee te din a nih thu te a sawi. Chief Minister chuan thenawm ram leh thenawm state buai avanga kan unaute tuamhlawm a ngaih avanga lungrual taka mi hrang hrangin tha an thawh dan leh lawmawm a tih thu te a sawi a. Harsatna hrang hrang tawhte hi tumruhna nen hmachhawn in, Mizoram chu ram nuam leh entawntlak, economy chak takah a siam theih a ni tih hre rengin, mahni zawn theuh ah tih tur leh tih theih te thahnemngai taka thawh a pawimawh thu a sawi.

Home Minister Pu Lalchamliana chuan police officer kalkhawmte chu general conference chibai bukin, mipui rawngbawl hna tha tak taka an thawh thin avangin lawmthu a sawi a. Hmasawn zel tur erawh an nih thu sawiin, discipline vawng kawngah te pawh tan la zui zelin, hriselna te ngaipawhmawh a tul thu a sawi a. Police tha ni tur chua kawg engkim mi invawng a inthunun mi nih a pawimawh thu a sawi. Home Minister chuan police-te chu mahni thawhchhuah ni lo sum leh pai it na laka fihlim zel tur te in a chah a. Police tihchak a thuamthat chu sawrkar pawhin a ngaihpawimawh thu sawi bawkin, tunah sum lama indiah tawklohna awm mahse a tul anga hma lak zel a nih tur thu a sawi a ni.

He Conference ah hian DGP Pu Devesh Chandra Srivastava pawhin thu sawiin, Mizoram Police Service in hma a sawn zel theihna tur mamawhna hrang hrang leh indaihlohna te CM leh Home Minister bulah a thlen a ni. Inkhawm hi MPSA President Pu Zosangliana (AIGP, HQ) chuan kaihruaiin, member thar lawmluhna neih a ni bawk a. General Secretary Pu Lalthakima (Addl. SP, CID) leh Financial Secretary Pu Zonun Sanga (Addl. SP, CID) te hnen atangin report ngaihthlak a ni a. Senior Vice President Pu C. Lalnunmawia (DIGP) chuan lawmthu sawiin hun hmasa hi a khar a ni. Chawhnu lamah rorel leh hruaitu inthlanna in a chhunzawm a ni.