Lawngtlai District-a Accredited Social Health Activist (ASHA)-te tana intuai tharna (refresher training) buatsaih chu vawiin khan National Health Mission (Mizoram) Mission Director Dr Lalrozama IAS chuan Lawngtlai CMO Conference Hall-ah a hawng.

Dr Lalrozama chuan ASHA-te fuihna thu sawiin, training chu an hna thawhna kawnga nasa taka pui theitu a nih dawn avangin rilru pe taka an thil zirte zir turin a chah a. ASHA-te chu mipuite nena innghenga hna thawktu tak tak, khawtlang hriselna atana mawhphurhna pawimawh ber changtu an ni a, an inthlahdah a thiang lo a ni, a ti.

He hun hi Lawngtlai Chief Medical Officer Dr Lalthlamuana'n a kaihruai a. NHM Mizorama state nodal officer (community process) Dr Lalchhuanawma leh state programme officer (reproductive and child health) Dr Hmingthanmawii te pawhin thu an sawi.

ASHA refresher training hian June ni 6-20 thleng a awh dawn a. State trainer Lalthanzami leh district trainer Lalkhawngaihdawngi Chinzah te chu resource person niin, ASHA hna thawh dan tur leh hma lakna thar turte an zirtirin an kawhhmuh dawn a ni.