Vawiin chawhnu khan DC Conference Hall, Keifangtlang, Champhaiah Mizoram Sawrkar hnuaia scheme pawimah tak ‘My Project, My NEDP- Mipui Mamawh Intawm Ruahmanna (MiMIR)’ tih chu Pu Vanlalngaihsaka IAS, Champahi DC chuan Champhai District chhunga hman ve theih turin a tlangzarh.

Champhai bawrhsap chuan sawrkar Scheme pawimawh tak MiMIR chu Champhai District-in tangkai taka a chhawr ve theihna tura hmalak nise a ti a. A zau thei ang bera Village Council tinte hriattirna pek nise a ti bawk.

‘My Project, My NEDP- Mipui Mamawh Intawm Ruahmanna (MiMIR)’ hi kalphung thar Mizo mipuite nunphung mil leh huapzo, State sum leh pai dinhmun nakin thlenga siamthatna chhenfakawm tak ni thei tura duan a ni a. Hemi hnuaiah hian District tinah hmasawnna ruhrel, mitinte chhawr theih tur siam a ni dawn a. Scheme hnuaiah hian cheng  Vaibelchhe 8 dah a ni a, District tinah cheng Vaibelchhe  1  hu project kalpui tura ruahman  niin, Project thlan kawngah dik leh felfai taka tih tum a ni. MiMIR hnuaia Project  siama inelna chu June-August, 2018 chhungin neih a ni anga, sanction fund chu September thla  chhunga pekchhuah hman tum a ni. Hemi tur hian Khawpui, Thingtlang leh Veng chhung atangtein Project siam theih a ni a, a tel duhte chuan July Ni 16, 2018 ral hma ngeiin SDO (Sadar) hnenah Project Concept Paper thehluh tur a ni.

Project Concept Paper chu Joint Committee kaltlanga thehluh tur a ni a. Joint Committee-ah hian Local Council/Village Council leh  YMA, MUP leh MHIP atanga aiawh member 2 theuhte an awm dawn a ni. Hemi kaltlang lo hi chuan Project engmah pawm a ni lo ang. Joint Committee member tinte chu Project pawm leh pawm loh tur chin lo remruatpuitu an ni. Project Concept Paper chu SDO (Sadar) hnenah thehluh tur a ni ang a, chungte chu District MiMIR Committee DC kaihhhruaina hnuaia awm chuan a lo endik ve leh dawn a. Endikna atangin Project tha zual 20 thlanchhuah leh ani ang a, chungte chuan District MiMIR Committee  hmaah Project Presentation pe lehin chuta tang chuan District tana Project tha ber chu thlanchhuah a ni tawh dawn a ni.

Project chu District huam chhunga khawpui, thingtlang leh Veng chhunga hmasawnna ruhrel chhawrnahawm, inhmantawm theih leh tangkaipui tham  cheng  vaibelchhe 1 aia tamlo a ni tur a ni a. Project te nawi siam nual lovin Project lian tham pakhat mipui vangtlang intawm theih, hmasawnna thlen thei  tha tawk tak a ni tur a ni a.  Project chhawrtlak hnathar siamthei leh thil thar hlak angte chu MiMIR hnuaiah hian ngaihpawimawh hmasak a ni ang. Project siamna atana ram mamawh ang chiah MiMIR fund emaw, sawrkar emawin ram leina a tum dawn lo a ni. Hemi chungchang hrechiang duh tan SDO (Sadar) hnenah zawhfiah theih a ni.

Attachment

  • Loading attachment...