SIPMIU-in vantlang inthiarna (Community Toilet block) Aizawl veng hrang hrang hmun sawm (10) ah a sa a, heng hmunte hi Bawngkawn Bazar, AMC – Thuampui, Bethlehem Vengthlang, Mission Veng South, Aizawl City Bus Terminal – Ngaizel, Aizawl New Market Dawrpui, Dawrpui (near MC), Zarkawt, College Veng, Zemabawk Bazar an ni a. Community Toilet Block (ekin) sawm (10) te hi SIPMIU ina a estimate zat hi a tirah Rs. 1,55,55,000/- (Rs.1.56 crore) a nih laiin CPHEEO, Ministry of Urban Development (MoUD), Government of India chuan Rs. 55 lakhs (Rs. 0.55 crore) ah chauh a phal a. Rs. 55 lakhs hian Community Toilet Blocks sawm (10) sakna a daih loh avangin CPHEEO, MoUD, Government of India ah thlen leh a ni a, Rs. 1,57,00,000/- man turin estimate hi remtih a ni.
Heng Community Toilet block (ekin) te hi 13 sqm atanga 44 sqm a zaua sak niin block tinah hian hmeichhia leh mipa inthiarna a hran ve ve a siam a ni a. Ekin tinah hian hmeichhia leh mipa inthiarna zunin pakhat (1) atanga pali (4) leh ekin pakhat (1) atanga pahnih (2) theuh siam a ni. Hei bakah hian kut silna (wash basin) pakhat (1) emaw pahnih (2) theuh siam tel a nih bakah hmun thenkhatah chuan inbualna te pawh siam tel a ni bawk. A sakna hmun te hi Local Council te nena en hova thlan niin hmun remchan dan azirin chhawng khat emaw chhawng hnih, chhawng thum thlenga sak a ni. Hmun thenkhatah phei chuan market shed leh Local Council House siam tel a ni.
Community Toilet Block (ekin) sak hna hi ADB Procurment Guidelines in a tarlan angin tender, National Competitive Bidding (NCB) anga chhuah a ni a. Tender vawi khatnaah firm pakhat chauhin tender a chhang a, chhangtu awmchhun M/s SS Construction, Chaltlang, Aizawl chu technical qualification teh fungah a tlin loh avangin Asian Development Bank (ADB) phalnain tender chhuah nawn leh a ni. Tender vawi hnih chhuahnaah hian firm pahnih (2) in tender an chhanga, chung te chu M/s SS Construction, Chaltlang, Aizawl leh M/s Gangwal Engineering & Construction Company Pvt. Ltd., Silchar te an ni. He firm pahnih (2) atang hian M/s Gangwal Engineering & Construction Company Pvt. Ltd., Silchar hi technical qualification tehfungah tlingin thlan a ni.
M/s Gangwal Engineering & Construction Company Pvt. Ltd., Silchar ina tender a chhanna man chu Community Toilet Block sawm (10) atan Rs. 2,06,32,141/- (Rs. 2.06 crore) a ni. A chhanna hi tender amount Rs.1,57,00,000 (Rs. 1.57 crore) aia a san em avangin inremsiam (negotiate) a ni a, ADB remtihna ang leh contract tender chhangtu nena in negotiate-in Rs. 1,76,93,303 (provisional sum telin) contract agreement hi sign a ni. Communtiy toilet block pakhat man hu chu Rs. 17.69 lakhs tihna a ni. Toilet sakna hmunah te hian service line (electric pole, tui pekna T-cluster, tui pipeline leh tuizem hlui) thiah leh siamthat hna te pawh thawh tel a ngaih avangin contractor in toilet block sawm (10) a sak zawhna hi Rs.1,78,80,698 (Rs. 1.788 crore) a ni.
UD&PA Department hian hmun hrang hrangah Public Toilet/Communit Toilet sak hna hi Scheme remchang apiangah a kalpui zel a. Hei hian tuna zunin thianghlim lo leh hing tak tak te hi tui connection nena awm, zunin leh ekin thianghlim zawk neihna tur leh khawpui faina atana hmalakna a ni a. UD&PA ina a kalpui ekin mipa leh hmeichhia tana a hrang, wash basin leh vending unit (dawrte) awm anga design thin a ni a. Hetiang hi a tlangpui thuin Rs. 7.00 lakhs vela sak zawh theih thin a ni a, a hmun azirin a danglam hret hret thei bawk a. SIPMIU ina a siam hi hetiang toilet aia changtlung leh zau zawk a ni a, hmanrua pawh a tha thei ang ber hman niin kut silna pawh a awm thlap a ni. Community Toilet block pakhat Rs.5.5 lakhs a sa tur anga tehkhin hi teh dan dik tawk lo niin a lang a ni. Ekin siam hi rin aia a to anga a lang a nih pawhin Asian Development Bank Procurement Guidelines anga kalpui a ni a. Contractor chhanna tur dânin a phal angin negotiation pawh neiin, theihtawpa tihhniam a ni a. Hemi baka tha zawka kalpui dan a awm chuang lo a ni.
