Vawiin khan Lawngtlai District Development Co-ordination and Monitoring Committee (DISHA) chu an Chairman, Lok Sabha MP Pu CL Ruala leh Co-Chairman, Rajya Sabha MP Pu Ronald Sapa Tlau te hovin Lawngtlai DC Conference Hall-ah an thu khawm.

Pu CL Ruala chuan sawrkar policy hrang hrang hlawhtlin leh hlawhtlin loh chu a enkawltu official-te kutah thui tak a innghat a ni tiin, an hna thawhah a tha ber hlen chhuah tum turin official kal khawmte chu a chah a ni.

He DISHA thut khawmah hian member leh sawm bik sawrkar official-te, bank leh tlawmngai pawl ai awhte an tel a. January ni 24, 2018-a DISHA thu rel bawh zui dan ngaihthlak niin, kum 2017-18 4th Quarter (January-March) chhunga Lawngtlai District-a hmasawnna hna hrang hrang thawh dan te thlir ho a ni a. Kum 2018-19 chhunga hma chhawpte pawh tarlan niin, hma lak dan tur rawtna hrang hrang sawi ho a ni bawk.

DISHA thut khawma tarlan dan chuan, DRDA kal tlanga hna thawh Mahatma Gandhi National Rural Employment Guarantee Scheme (MGNREGS) hnuaiah Lawngtlai District-ah job card 29137 awm mekin, kum 2017-2018 chhung khan ni 90 inhlawhna siam a ni a. Pradhan Mantri Awaas Yojana-Gramin (PMAY-G) hnuaiah kum 2016-2017 chhung atana target beneficiary 912 atangin beneficiary 899 chu in sakna pek fel tawh an ni.

PHED hnuaia Swachh Bharat Mission (Gramin) hma laknaah inthiarna in nei lote tana IHHL 9542 sak tur chu sak zawh vek tawh a ni a. Lawngtlai District chu pawnlera inthiar awm lohna (open defecation free) district-a puan theih tawh a ni.

He’ng bakah hian thingtlang khaw tin leh in tina eng pek hna thawh mek te, inkal pawhna kawng chungchang te, hriselna leh zirna lam te, thingtlang mite khawsak chawi kan nana hma lakna te, NSAP leh, BADP hnuaia ramri hnaih khuate tihchangtlun hna thawh chhoh mek chungchang te pawh he thut khawmah hian sawi ho a ni bawk.