Vawiin khan Lawngtlai DC Conference Hall-ah H&FW Dept hnuaia National AYUSH Mission (NAM) huaihawtin Lawngtlai District chhunga ASHA-te tan AYUSH tangkaina leh hman dan tur zir hona buatsaih a ni a. Lawngtlai District Senior Medical Officer (SMO) Dr S. Thaizi chuan training hi a hawng.

AYUSH chungchanga ASHA-te training neihpui tur hian Aizawl atangin NAM-a Programme Officer pahnih – Dr Lalkhawngaihi Renthlei leh Dr T. Lalliankimi te bakah, Fitness Instructor leh staff dang te an lo kal a. AYUSH awmzia leh tangkaina te, zunthlum leh natna tlanglawn dang enkawl nana ramhmul damdawi hman theihte leh a hman dan tur te an zirtir a. AYUSH damdawi bawm (drug kit) hman dan pawh zirtirin, a tihchhinna leh sawi hona hun tha tak hman a ni bawk.