Vawiin hian Serchhip Addl DC Pu Chuauhnuna, MCS kaihhruaina hnuaiah District Task Force on Immunization Committee te chu Bawrhsap pisaah an thukhawm a. Kan hma lawk Dt. 16.04.2018 atanga Mizoram puma Measles- Rubella (M-R) Vaccine pek beihpui thlak kalpui dan tur an thlir ho. 

He beihpui thlak, nikum lam atanga inbuatsaihna kalpui tan tawh hi Serchhip ah chuan Bawrhsap Pi Sangchhin Chinzah hova a hawnna inkhawm te neia bul tan ani ang a. Hapta nga (5) chhung kalpui tur niin vaccine la tur naupang thla kua (9) atanga kum sawmpanga (15) chin ten kim taka an lak ngei theih nan khawtlang hruaitute, tlawmngaipawlte, sawrkar Department hrang hrangte leh zirlai nu leh pa te phungbawma sawm bakah kohhran (Biakin) tina chhiarchhuah tur lehkhate buatsaih chunga kalpui tur a ni. Khaw tin/Veng tin te chu he vaccine pek hun chhung hian a tam thei ang ber an khaw/Veng bil Information Mike a puang thin tura hriattir an ni ang. Tin, khawtinin Vaccine Supervisor an neih kim theih nan Health Department lama thawktute indaihlohna phuhruk dan ruahmanna siam niin transportation plan pawh vawiin hian en ho nghal a ni bawk. 

Meeting ah hian IPPI vaccine pek hnuhnung berah khan Serchhip District ah zaa za ( > 100 %) aia tam (District chhunga mikhual te pawh pek vek an nih avangin) pek hial a lo nih tawh thu tarlan a ni a. Harsatna dangin a tlak buak a nih loh chuan M-R Vaccine pawh zaa za (100%) pek theih ngei beisei a nih thu thawktuten an tarlang. Zaa za pek an nih ngei theih nan District Task Force Committee chuan khua/veng tina khawtlang hruaitu, tlawmngaipawl, kohhran leh nu leh pate chu thawhpuiah a sawm nghal bawk a ni. 

India ramah M-R Vaccine pek beihpui thlak hi kalpui mek niin tun thleng hian State 15 a naupang thla kua leh kum 15 inkar chin mi 8 crore pek tawh an ni a. Mizoramah April ni 16 atanga tana hapta nga (kar 5) chhung beihpui hi thlak zui tur niin, hapta hmasa pahnih hi zirna in hrang hranga naupangte peknan hman a ni anga, a dawtah Anganwadi a naupang inziak lute hnenah pek leh tur niin a dawt lehah zirna ina kal tawh lo, kum 15 leh a hnuai lam hotel eh vaccine la dawng lo midangte zawn chhuahna neih zui zel tur a ni dawn a ni. 

Serchhip District Task Force on Immunization Committee chuan he vaccine la tur naupangte chu kim taka lo la theuh turin a ngenin a hriattir a ni.