3702/2022-2023
Ramtuk thla ni 27, 2023: Bangladesh sipaite'n Chittagong Hill Tracts-a military operation an neih avanga inkahna thleng kaihhnawiha November 2022 leh a hnu lama Bangladesh aṭanga Lawngtlai District chhunga sahimna zawnga lo tlan lutte dinhmun leh anmahni chhawmdawl leh enkawl zui zel dan tur chu vawiin khan Nodal Officer for Bangladeshi Asylum Seekers, DRDO Project Director Pi Marilyn Rualzakhumthangi hovin DC Conference Hall, Lawngtlaiah sawi ho a ni.
He hunah hian District Administration leh sawrkar department official-te, Bawm Students' Association, Pang Zirlai Pawl leh Central Young Chakma Association ai awhte an tel a. Chairman, Pi Marilyn Rualzakhumthangi chuan Lawngtlai District chhunga Bangladesh aṭanga raltlan lo lutte dinhmun tlangpui sawiin, SDO (Sadar) Pi TT Beikhaizi chuan District Administration aṭanga chhawmdawl leh enkawl zui kawnga hma lak tawh chin a tar lang a. Raltlante'n pawl, kohhran leh mimal aṭanga chhawmdawlna an dawn dan an hriat theih chin report a pe bawk.
He hunah hian sahimna zawnga District chhunga lo luh belhte an awmna khua tan phurrit a nih loh nana awmze nei leh zangkhaipui zawk tura an awmna hmun ruahman chungchang te, raltlan lo lutte ei leh bara an intodelh theih nana lo leh huan an neih theih dan tur leh thlai chi ngaihtuahsak chungchang leh inhlawhna an neih theih dan tur chungchang bakah, hun rei zawk thlira raltlante chhawmdawl leh enkawl zui nana thil pawimawh hrang hrangte sawi ho a ni.
District thuneitute'n an chhinchhiah danin, Bangladesh aṭanga lo tlan lut hnuhnung berte hi mi 53 niin, February ni 17, 2023 khan an lo lut a. Tun dinhmunah Lawngtlai District chhungah November 2022 leh a hnu lama Bangladesh aṭanga raltlan lo lut mi 541 (mipa 291 leh hmeichhia 250) an awm mek a. An zinga mi 337 chu kum 18 chung lam niin, kum 18 hnuai lam mi 204 an awm bawk a. He'ngte hi Lawngtlai District chhung khaw pariat (8)-a relief camp-ahte an awm hlawm a ni.
Attachment
- Loading attachment...
