3703/2022-2023

Lunglei the 27th February, 2023 - Sawrkar Laipui Minister of State for Tribal Affairs Smt Renuka Singh Saruta chuan vawiin khan zan khat leh ni hnih cham turin Lunglei alo thleng. Kawmzawl Helipad, Lungleiah chawhnu dar 12:35 ah khan rawn tumin Lunglei DC Pi Ramdinliani, IAS leh sawrkar official dangten an lo dawngsawng a ni.

Minister hian Mara Tribal Girls' Hostel Lunglawn, Lunglei a hawn hnuah Lunglei DC Conference Hall-ah Lunglei District Head of Office te meeting a neihpui a. He meeting neih zawhah hian Lunglei District-a NGO hruaitute leh tribal leaders te inkawmhona hun a hmanpui a ni.

Smt Renuka Singh Saruta chuan District hmasawnna chu Head of Office kalkhawmte kutah thui tak a innghat tih sawiin, an hma zawn theuha hna chanpual leh tih tur awm te uluk leh taima taka thawk zel turin a chah a. An hna kalpui danah District mipuite hmasawnna leh hamthatna dah pawimawh hmasa thin tura chahin Sawrkar Laipui schemes te pawh lo zirchianga, mipuite hmasawnna tura hmang tangkai turin a chah a. Central sawrkar chuan tribal te hmasawnna turin scheme tha tak tak a duan thu sawiin tribal te thil siamchhuah te hralh chhuah leh ram pawn lama thawnchhuah kawngah te pawh tan lak zel a ni, a ti a. Mizorama Self Help Group, pawl dangte leh mimal thil siam chhuah te pawh zau zawka hralhchhuah an nih theihnan Department thawktute chu rilru senga, Central sawrkar ah ruahmanna leh mamawhte thlen turin a chah a, Ministry chuan an mamawhte lo tih hlawhtlin sak turin a inhuam takzet a ni, a ti a. Lunglei District chu international border awmna, Bangladesh ram nena ramri intawm a nih avangin District Officials, ramri hnaih a khaw awmte leh a bik takin ramri-a duty sipaite chu boruak tha siam zel tura hmala turin a chah bawk a. Lunglei District mipui ten duhsak taka an lo hmuak leh an lo dawngsawng chu thinlung taka a lawm thu sawiin Mizoram chu ram nuam tak, a mi chengte pawh mi taima leh chhel tak ni a a hmuh thu sawiin hmasawn zel tura theihtawp chhuah turin a chah a ni. 

Meeting-ah hian Lunglei Deputy Commissioner Pi Ramdinliani, IAS chuan Lunglei District chanchin, dinhmun leh hmasawnna hna kal mek te sawifiahna hun presentation a nei a, Department hrang hrang hnuaia Centrally Sponsored Schemes kalpui mek te dinhmun a tarlang a ni. 

Head of Office te meeting a neihpui zawh hnu hian Pi Renuka Singh Saruta hian tlawmngai pawl hrang hrang hruaitute leh khawtlang hruaitute inkawmhona hun a hmanpui a. NGO hrang hrang te hmalakna, an mamawhte leh ram hmasawnna tura an thil vei zawng te chipchiar takin a sawipui a. NGO leh khawtlang hruaitute chu ram leh hnam hmasawnna atana an pawimawh takzet thu sawiin Sawrkar finchhuah tu lo ni zel turin a sawm a ni. 

Minister hi Pu Madhup Vyas, Secretary, Social Welfare & Tribal Affairs, Government of Mizoram, Pi Zodingpuii, Director, Women & Child Development, Social Welfare & Tribal Affairs Department, Government of Mizoram leh official dangten an rawn tawiawm a ni. 

Attachment

  • Loading attachment...