3704/2022-2023

Kolasib dated 28th February 2023: Vawiin khan Venglai Bazar, Kolasibah District Urban Development Office buatsaihin ‘Deen Dayal Antyodaya Yojana – National Urban Livelihood Mission Festival 2023’ hawnna hun hman a ni a. He hun ah hian DAY-NULM, Kolasib hnuai a Self Help Group 33 leh Self Employment Program kaltlanga eizawnna bultan mek ten an hmalakna phochhuahna hun an hmang a. DAY-NULM Festival Exhibition cum Food Fest hi Pu John LT Sanga, Deputy Commissioner chuan hawngin Pi Rebecca Laldinmawii Hrahsel, District Urban Development Officer chuan hun a kaihruai a ni.

Pu John LT Sanga, Deputy Commissioner chuan Self Help Group chu eizawnna ngelnghet siam kawng a nuho intanpuitawn tur a pawl anga hmalakna pawimawh tak a nih thu sawiin thiamthil hrang hrang inzirtawnna hmun tha tak a nih thu a sawi a. Sawrkar laipui ruahmanna angin eizawnna dap kawng ah hmeichhiate tih hmasawn chu DAY-NULM chuan a tum ber a nih thu leh chumi tihlawhtling tur a DUDO kaltlanga SHG-te tan a hmathatna hrang hrang kalpui a ni thin chu lawmawm a tih thu Deputy Commissioner chuan a sawi. Hmeichhe dinhmun dawmkan leh tih chak kawng a hmalakna kalpui a nih mekna chuan hlawhtlinna hmelthar tam tak a thlen mek nia a hriat thu Pu John LT Sanga chuan tarlangin hetihrual hian mipate pawh hian hmeichhiate kaihruaitu ni tura tan lak thar a ngaih thu a sawi bawk a ni.

Pu Zothanmawia Hrahsel, SD&I Manager, DAY-NULM tarlan danin Social Mobilization & Institutional Development hnuai ah Kolasibah hian SHG 146 an awm mek a, chung zing a 144-te hnen ah chuan bultanna tur sum cheng sing khat theuh pekchhuah a nih thu te, Area Level Federation 6 zinga 3 hnen ah cheng sing nga pek chhuah a nih thu leh a dang 3-te hnen ah pawh Revolving Fund hi pekchhuah leh thuai tur a inbuatsaihna a kal mek thu a sawi. Support to Urban Street Vendors hnuai ah Kolasib khaw chhung chu Vending Zone 6 a then a nih thu te, PM SVANidhi scheme kaltlangin kawngsir a dawr chawi sawn theih siam mi 26 hnen ah tanpuina pek a nih thu te, Scheme of Shelter for Urban Homeless hnuai ah naupang enkawlna hmun, Kolasibah 7 leh Vairengteah 2 tanpui thin a nih dan te a tarlang a. Employment through Skills Training & Placement kaltlang a eizawnna tling thiamthil zirtirna pek a nih dan leh eizawnna bultan duh tan Self Employment Program hnuai a loan pekchhuah a nih thin dan te a tarlang bawk a ni.

‘DAY-NULM Festival 2023 Exhibition cum Food Fest’ hawnna hun ah hian Kolasib khaw chhung a sawrkar pisa hrang hranga hotute, khawtlang leh NGO hruaitute an tel a ni.

Attachment

  • Loading attachment...