3705/2022-2023

Champhai, the 28th February, 2023: UD&PA Department Champhai hnuaia City Mission Management Unit (CMMU) leh Deendayal Antyodaya Yojana-National Urban Livelihoods Mission (DAY-NULM) te tangkawp buatsaih DAY-NULM Festival 2023, Exibition-cum-Food Fest, February ni 28 atanga March ni 2, 2023 thleng awh tur chu vawiin chawhma dar 11 atang khan CHANEM Complex, Champhaiah tan a ni.

A hawnna hun tawi buatsaih hi District Bawrhsap Pu James Lalrinchhana chuan khuallian ni a hmanpuiin, DAY-NULM Festival chu a duh apiangte tlawh leh dawr theih turin a hawng a; Stall hrang hrangte a fangkual nghal bawk.

Khuallian Pu James Lalrinchhana chuan UD&PA Department hmalakna scheme pawimawh tak DAY-NULM kaltlanga an hnuaia beneficiary-te hmalakna phochhuah leh zawrhna hun DAY-NULM Festival buatsaih a ni chu lawmawm a tih thu a sawi a. DAY-NULM scheme kaltlangin khawpuia chengte tana hmalakna hrang hrangte tarlangin, SHG member-te chhawmdawlna kalpui thin a nih thu te, khawpuia cheng thalaite eizawnna tur thiamna pek leh chumi mila hna an insiam theih nana hmalak sak te, eizawnna din duhte tana bank kaltlanga hmalak dan tur leh thil zuarte tan inphona tur ngaihtuah sak te, khawpui chhunga awm chenna neilote tlukluhna tur in siam leh Covid hrileng avanga street vendor eizawnna kawnga harsatna tawkte tana loan tha tak chhawpchhuah kawnga hmalaknate chu a langsar zual a nih thu a sawi a ni.

District Bawrhsap Pu James Lalrinchhana chuan Bank kaltlanga hamthatna awmte eizawnna atana puitu tura chhawr tangkai thiam a tul thu a sawi a. Sawkar scheme tha tak tak te a nih dan tur anga hman tangkai kawnga mawhphurhna chu mipuite kutah nasa taka a innghah tlat thu sawiin, mahni hmakhua ngaia thahnem ngai taka thawh chu hlawhtlinna mai bakah sawrkar hmalaknate thlawpna leh tanrual puina tha tak a ni, a ti a. DAY-NULM hnuaia hamthatna dawngtute chu ke chheh rem an rah theih nan duhsakna a hlan a, mipuite chu DAY-NULM Festival-a thil zawrhte hlut saka tlawha dawr theuh turin a sawm a. Festival buatsaih chuan Department hmalakna leh scheme hrang hrangte phochhuah bakah SHG Group te chawisan leh khawtlang hmasawnna a siam ngei a beisei thu a sawi bawk.

He hun hi Pi R.Lalnunkimi, DUDO Champhai chuan kaihruaiin kalkhawmte lawmna thu a sawi a. DAY-NULM City Mission Manager Pi Baby Lalremtluangi hnen atangin DAY-NULM hnuaia hmalakna hrang hrangte ngaihthlak a ni a. Pi Laltansangi, Urban Resourse Person hnen atangin SHG te chhawmdawl leh kaihhruai kawnga hmalaknate ngaihthlak a ni bawk.

DAY-NULM Festival 2023, Exibition-cum-Food Fest Champhaia buatsaihah hian Stall hrang hrang 37 siam niin, DAY-NULM hnuaia beneficiary ten an thil siam leh thiam thil dehchhuahte an pho chhuak a, dawr theih turin an siam bawk a. Heng bakah hian tlawhtu naupangte tan intihhlimnate buatsaih a ni bawk.

Tun dinhmunah hian DAY-NULM Champhai hnuaiah hian Self Help Group 102, anmahni enkawltu Community Organizer 2 leh Urban Resourse Person 2 awmin SHG te hi thla tin vawi 2 an tlawh thin a. Scheme kaltlang hian thiam thil zirna training hrang hrangte buatsaih thin a ni a. Self Employment Scheme hnuaiah mi 300 chuangin loan an la tawh a, skill training hmang hian mi 600 chuangte thiam thil hrang hrangte zirtir an ni tawh bawk.