No.2941/2021-2022

Aizawl Sahmulphah thla ni 10, 2021: Vawiin khan Lawngtlai Bawrhsap Dr Andrew H. Vanlaldika hovin a office chamber-ah Lawngtlai khawpuia bawlhhlawh leh in chhung khur hnawmhnawk thliar hran leh sawngbawl dan tur chungchang sawi ho a ni.

He hunah hian Lai Autonomous District Council (LADC)-a Executive Member i/c LAD/UD&PA Pu C. Rongura leh Executive Member i/c Sanitation Pu Lalropuia Chinzah te bakah, DRDA Project Director, UD&PA DPO & thawktute, LADC Sanitation official-te leh DIPRO te an tel a. Lawngtlai khawpui chhunga hma lakna tur hrang hrang - bawlhhlawh tawih thei leh tawih thei lo thliar hran dan tur te, plastic hnawmhnawk sawngbawl dan tur te, khawpui chei mawina lam leh mipuite'n hlawk zawka tha an thawh theih dan tur te sawi ho a ni.

Mipuiin bawlhhlawh tawih thei leh tawih thei lo an thliar hran theih nan hma lak tan ni se, tih a ni a. In chhung khur atanga thliar hran inzirtir hmasak ni se tih niin, a taka kalpuina atan Electric Veng chu model village atan thlan a ni a. A tahtawla hma lak chhoh zel tum a ni.

Sarwrkar laipuiin vawi khat hman atana siam plastic (single use plastic) hman khapna a tihchhuah tawh chu mipuiin an zawm theih nan hma lak chhoh zel tum a ni a. Hemi kaihhnawiha LADC hnuaia hma lakna tur hmachhawp hrang hrang awmte pawh he hunah hian tar lan a ni.

He hunah hian Lawngtlai Bawrhsap chuan LADC sanitation worker-te hman atan personal protective equipment (PPE) sawmhnih chu Sanitation changtu EM kutah a hlan bawk.