1587/2023-2024

2023 Thlazing ni 21: Lawngtlai District chhunga National Highway kawngpui zauh hna thawh mek leh Kaladan Multi Modal Transit Transport Project (KMMTTP) kawngpui laihnaa zangnadawmna ngiata Lawngtlai District Land Owners' Association te'n sawrkar an nawr mek chungchangah vawiin khan Lawngtlai Bawrhsap Pu H. Lalhmingthanga hovin DC Office Chamber-ah National Highway-54 zauh hna thawktute, Lawngtlai District Land Owners' Association hruaitute, Central Young Lai Association hruaitute leh sawrkar official-te an ṭhu khawm.

Lawngtlai Bawrhsap Pu H. Lalhmingthanga chuan kawngpui pahnih chu District mipuite inkal pawhna leh ei leh bar thiar velna kawng pawimawh tak ve ve a nih avangin ṭha taka siam leh enkawl a ṭul tih a sawi a. Ram tana thil ṭha duh avanga kawng ṭha neih duha hma lakna chu lawmawm a tih thu sawiin, District mipuite tuarna thlen thei zawnga hma lakna erawh awm lo hram se ṭha a tih thu a sawi.

He ṭhut khawmah hian National Highway-54 kawngpui siam ṭhat hna thawh meka Lawngtlai leh Kawlchaw 'W' inkara hna thawh chhe lutuk nia an hriat avanga Central YLA-in August 8, 2023 aṭanga Lawngtlaia NHIDCL leh ICT Office an kharsak chu August 18, 2023-a Central YLA hruaitute leh hna thawktu company hotute'n hna ṭha lo lai a hmuna en ho va, hna ṭha zawka thlak tura an inbiak rem hnuah hawn a nih leh tawh thu tar lan a ni a. Hemi chungchangah hian hna ṭha zawk a awm theih nan official-te leh tlawmngai pawl te chuan mahni zawnah hma lakna kalpui ṭheuh ni se, tih a ni.

Vawiin meeting-ah hian kum 2010 aṭanga hna thawh ṭan, Kaladan Multi Modal Transit Transport Project (KMMTTP) kawngpui, Lawngtlai aṭanga Zochachhuah inkara sialin an ram a tihchhiatsak intel khawm, Lawngtlai District Land Owners’ Association hruaitute chuan kum 14 zet zangnadawmna phuta hma an lo lak tawh thu te, a kaw tawpah an ṭan tawh thu leh August 1, 2023 aṭanga Deputy Conservator of Forests (Wildlife), Chhimtuipui Wildlife Division, Lawngtlai Office-a thawktute chu office kai thei lova an dan thu leh KMMTTP kawngpuia hna thawktu company-te pawh an chhet chhuah an remtih loh thu an sawi a. Lawngtlai Bawrhsap Pu H. Lalhmingthanga chuan ram neitu intel khawmte hma lakna chuan District chhim lam leh khawthlang lam mipuite tan inkal pawhna leh ei leh bar mamawh thiar velnaah harsatna a thlen theih avangin hna thawktute chet chhuah an remtih loh chu titawp turin ram neitute chu a ngen a. Land Owners' Association hruaitute chuan Deputy Commissioner-in a ngenna chu zahawm an tih thu leh General Body Meeting kova an lo sawi zui tur thu an sawi a ni.