No.1832/2021-2022

Lawngtlai, Thlazing ni 13, 2021: Vawiin khan Lawngtlai Bawrhsap Dr Andrew H. Vanlaldika chuan Mizoram Journalists' Association (MJA), Lawngtlai District member-te lengah sawmin, District Consumer Redressal Forum leh Legal Metrology chungchanga District mipuite tana hriat tur pawimawh chi hrang hrang a sawipui.

Bawrhsap Dr Andrew H. Vanlaldika chuan Lawngtlai District-ah consumer-te dikna chanvo rah behsak a tam hle nia a lan thu sawiin, consumer-te chuan social media-a inphun lungawi mai bak chu, a thlenna tur dik taka thlen nachang hre lovin, an thlavang hauhsaktu leh zirtirtu an mamawh hlea a hriat thu a sawi a. Consumer-te lungawi lohna ngaihthlaksak a, an thu rem turin District Consumer Redressal Forum a awm thu leh, consumer-te'n pan nachang hria se a duh thu sawiin, tuialhthei, eirawngbawlna gas leh dawr thil buk dik leh dik loh chungchangah pawh Lawngtlaiah Legal Metrology awm tawhin, Inspector-in a thut chilh a, chak taka hma lak chhoh zel tum a ni tih a sawi.

Bawrhsap hi Lawngtlai DIPRO Pu C. Lalhruaitluanga leh Legal Metrology Inspector Pu Jeffrey Zothanpuia te'n tawiawmin, District MJA member-te hi an President Pu Lalngheta Ralte chuan a ho va. Lawngtlaia consumer-te tiharh thar tura hma lak dan tur leh District Consumer Redressal Forum leh Legal Metrology te mipuite'n tangkai zawka an chhawr theih dan tur te sawi ho a ni.

Bawrhsap chuan Lawngtlaia Legal Metrology awm thar chu consumer-te tana thil lawmawm tak a nih thu sawiin, mipuite'n sumdawng atanga an thil leite a that tawk leh tawk loh te, buk a tlin leh tlin loh te an endik thin dawn tih a sawi a. Thil man bithliah sa a zuartutr'n an duh duha lo tihsan ngawt te pawh dan anga man a, hrem theih a nih thu sawiin, consumer-te'n an dikna chanvo hria a, dawr atanga thil an leiin a receipt/cash memo dil zel a, dik lo a awm chuan District Consumer Redressal Forum-ah a finfiahna nen thlen zel turin a chah a. Complaint hi President, District Forum address-in, DC office-ah pawh theh luh mai theih a nih thu a sawi.

District Forum-ah hian President leh member pahnih an awm a. President chu (Lawngtlaiah President ni phak Judicial Officer an awm loh avangin) Judge, Fast Track Court, Siaha a ni a. Pu Mc. Lalrokhuma, Associate Professor, Government Lawngtlai College leh Pi Vanlalhlupuii Fanai, Headmistress, Govt Southern Public High School te chu member an ni.