No.1833/2021-2022

Champhai, 13th August, 2021: Law & Judicial Minister Pu T.J. Lalnuntluanga chuan vawiin khan khawchhak tlangdung power pekna tihchangtlung kawnga tul angte a hmunah kalin a enfiah a, 132 kV Sub-Station Khawzawl tlawhin District thuneitute leh P&E Department hotute nen hmalakna hrang hrangte an enfiah hnuah MJA Press Club Champhaiah Chanchinbumite kawmna hun an nei.

Chanchinbumite a kawmnaah thu sawiin, Law & Judicial Minister Pu T.J. Lalnuntluanga chuan power & electricity hnianghnar zawk nei turin sawrkarin theihtawp a chhuah mek zel thu leh, mei eng neih loh changa theihtawp chhuah thintu P&E Department thawktute fakawm a tih thu a sawi a. Zuangtui atanga lokal 132 kV line hman mek bakah, Khawzawl to Champhai 132 kV line belhchhahna tur hrui thar thlun tum a nih thu sawiin, 132 kV line Serchhip to Khawzawl via East Lungdar hmalakna thawh mek a nih thu leh, Serchhip to East Lungdar zawh tawh a nih bakah, East Lungdar to Khawzawl inkar siam hna thawh mek a ni, a ti a. Chanchinbumite chu mei eng hnianghnar leh changtlung nei tura P&E Department hmalaknate mipui hnena puanzar leh hrilhhriat kawngah theihtawp chhuah turin a sawm a ni.

Law & Judicial Minister hi Er. Vanlaltlana C.E (Distribution), Pu C.Vanlalena C.F (Central Circle), Pu Lalrinpuia Varte SP Champhai, Pu Lalchhanhima, S.E Champhai Power Circle leh Official dang ten an tawiawm a ni.

Minister hian vawiin vek khan Khawzawl DC Pu C.C Lalchhuangkima pawh kawmin Khawzawl atanga Champhai District eng pek tihchangtlung dan turte sawipuiin, Khawzawl DC hian Minister enkawl Department Law & Judicial, Forest leh Transport Department hmunhma siam dan turte a sawipui bawk a ni.

Zuangtui to Champhai 132 kV line a chhiat changin Serchhip to Khawzawl via East Lungdar 33 kV level in electric current lak thin a ni a. 33 kV line hi 132 kV level a tihsan hna thawh zawh tawh a ni a. 132 kV level a charge tur hian E.Lungdar 33 kV Sub-Station hi 132 kV level in hmanraw changtlung zawk nena siam len a ngai a, equipment hrang hrangte 132 kV level a upgrade vek an ngaih avangin hun rei lote a zawh mai theih a ni lo va, a theih anga hna kalpui mek zel a ni. Tunah hian transformer commission tura buaipui mek a ni a, Serchhip to E.Lungdar 132 kV level-a hlankai leh E.Lungdar Sub-Station hnate hi Serchhip enkawl a ni a, Khawzawl to E.Lungdar line upgrade hna hi Khawzawl lamin an buaipui thung a ni.

Khawzawl to E.Lungdar inkara tower part bo leh thawmthat ngai siam that hna hi March 2019 ah thawh zawh a ni. 90 KN Disc Insulator-te 120 KN Polymer Insulator hmanga thlak hna April, 2020 a zawh a ni bawk a. 132 kV Sub-Station Khawzawl-ah 132 kV Bay thar siam belh ngai pawh a theih ang anga chhunzawm zel niin, Sub-Station-ah a rem chan zawkna avangin he Bay thar hi 132 kV Champhai line atan hman a ni a, June ni 7, 2021 khan commission niin, Champhai feeder atan hman zui mek a ni.

Central Electricity Authority meeting thutlukna angin Champhaiah 12.5 MVA Transformer thar leh, Khawzawl to Champhai inkarah 132 kV single circuit line (second line) thar hlak thlung tura ruahmanna a awm mek bawk a ni.