No.2191/2020-2020

Lawngtlai, Nikir thla ni 19, 2020: Mizoram Journalists' Association (MJA) Lawngtlai District chuan kum tina an lo hman thin, 'Green MJA Day' chu Lawngtlai Bawrhsap Dr Andrew H. Vanlaldika, MCS hovin vawiin khan an hmang.

Lawngtlai Press Club-a Day hawnna hun tawi buatsaihah Bawrhsap chuan Lawngtlai District MJA te chu Green MJA Day chibai bukin, thing phun leh enkawl zui pawimawhzia hriaa Lawngtlai District MJA te'n kum tina Green MJA Day an hmang thin chu fakawm a tih thu a sawi a. Journalist-te'n an chanchinbua a thua ziah mai piah lamah anmahni ngei che chhuak a, mi dang tana zir tur leh entawn tur an siam thin chu a hlu hle a ni tiin, thing phun chu a ngaih pawimawh leh a tui zawng tak a nih avangin MJA te'n an thing phunte enkawl zui leh phun belh chungchanga ruahmanna an siamah an sawm chuan a tlanchhiat loh tur thu a sawi.

Bawrhsap chuan kan chhehvel ramngaw leh boruak humhalh a tul thu sawiin, tun lai hri leng COVID-19 hian kawng tam takah chhiatna thlen mah se, ramngaw leh nungchate chungchangah ngaihtuahna thar mi a sentir tih a sawi a. Chhiatna leh hriin a ben harh kher ngai lo va, kan chenna leilung leh kan chhehvel boruak enkawl uluk nachang hriat a pawimawh a ni, a ti.

District MJA President Pu Lalngheta Ralte chuan journalist-te chu sawrkarin a hman tangkai thiam a ngai a, sawrkarin mipui tana an thawhte puang chhuaktu chanchinbu mite leh sawrkar chu inhlat thei a ni lo, a ti a. Sawrkarin mipuia puanzar tur hma lakna a neihte puanzar kawngah Information & Public Relations Department leh MJA te hmang tangkai deuh deuh se a duh thu a sawi a. Kum tina Green MJA Day an hmana an thing phunte chu an enkawl zui zel thu a sawi lang bawk.

Lawngtlai District Green MJA Day-ah hian District MJA-a Patron Member, Lawngtlai Bawrhsap chuan DC office complex-ah thing tiak a phun a. Hun hmanpuitu dang DRDA Project Director Pi Marilyn Rualzakhumthangi chuan a office bulah thing tiak phunin, District MJA hruaitute chuan District Information & Public Relations Officer Pu C. Lalhruaitluanga hovin DIPRO office chhehvelah thing tiak hi an phun bawk a ni.