No.2782/2021-2022
Aizawl Khuangchawi thla ni 29, 2021: Lawngtlai Bawrhsap Dr Andrew H. Vanlaldika hma laknaa Northeast Centre for Equity Action on Integrated Development (NEAID), Guwahati atanga Lawngtlai District-a COVID-19 hri leng dona atana hmanraw mamawh hrang hrang dil chhuahte chuan vawiin khan Lawngtlai a thleng a. He'ng bungruate hi Lawngtlai Bawrhsap Dr Andrew H. Vanlaldika chuan Lawngtlai Chief Medical Officer Dr LP Malsawma leh Lawngtlaia damdawi in pathum - District Hospital Lawngtlai, Lairam Christian Medical Centre & Hospital leh Christian Hospital Lawngtlai te kutah a hlan.

Lawngtlai Bawrhsap pisa tuala hmanraw inhlanna hun buatsaihah Bawrhsap Dr Andrew H. Vanlaldika chuan Lawngtlai District-a hri leng dona atana mamawh chi hrang hrang an thlente ngai pawimawha NEAID, Guwahati te Crypto Relief India nen tang kawpa an rawn luang chhuak chu lawmawm a tih thu sawiin, NEAID leh Crypto Relief te thil tha tih chu Lawngtlai District mipuite'n an hre reng tawh dawn a ni, a ti.

Additional Deputy Commissioner Pu James Miahlung chuan NEAID te nen an indawr dan sawiin, an thil rawn thawnte a tar lang a. Tun tuma NEAID te'n Crypto Relief nen tang kawpa bungrua an rawn thawn hi bawm 57 niin, cheng nuai sawm panga (Rs 15,00,000/-) man hu vel - damdawi, personal protective equipment (PPE), hmai tuamna (mask), kut tihthianghlimna (hand sanitiser), oxymeter leh hmanraw dangte a ni hlawm a. Tuna an rawn thawn ang leh bungraw dangte pawh rawn thawn belh an tum thu tar lan a ni bawk.