No.2781/2021-2022
Aizawl the 29th October, 2021: Tuikum Bialtu MLA leh Dy. Speaker ni bawk Er. Lalrinawma chuan vawiin khan Thentlang tlawhin khawtlangin Covid19 damlo enkawlna an siam 4C te a tlawh a, YMA Library building ah VLTF leh khawtlang hruaitute nen inkawmna hun a hmang bawk.

Deputy Speaker chuan, Thentlang khawtlangin Covid19 damlote an enkawlna kawnga an tanrualna leh inpekna fakin, sawrkar thu an zawm thatziate chu entawn tlak a tling tih a sawi a. Hetiang khawpa khawtlang tangrual tha NGO, Kohhran leh Sawrkar thawh hona hmun hi India ram hmun dangah an awm a rinawm loh a ni a ti. SOP te zawm tha chung zel leh VLTF te remruat ngaichang thiam zel turin mipuite a chah a. Hri kai palhte pawh tumah thinhrik lovin, kan zaa tanrual a tul a ni tih i hrereng ang u. Engtikah emaw chuan he hripui hian min la kiansan ngei ka ring tlat a ni, tiin Thentlang mipuite a chah a ni.

Er. Lalrinawma hian tun hnaiah sawrkarin Tuikum bial chhunga Health Sub-Centre thahnem tak Health & Wellness Centre ah a hlang kai tih sawiin bialtu MLA anih angin sawrkar chungah lawmthu a sawi bawk.

He hunah hian khawtlang aiawhin VCP & VLTF Chairman ni bawk Pu Siamliana chuan thu a sawi a. Khawtlangin hetiang harsatna kan tawh laia kan mamawh engkim min ngaihtuahpui thintu Bialtu MLA Er. Lalrinawma chungah lawmthu a sawi a. A kal zelna turah duhsakna a ni.