No.2780/2021-2022
Aizawl the 29th October, 2021: Mizoram Political Science Association (MIPSA) te chuan vawiin khan Government Aizawl North College ah “Political Economy of Development in Mizoram” tih thupui hmangin National Seminar an nei a. Home Minister Pu Lalchamliana chu khuallian a ni.

Pu Lalchamliana chuan sawrkar inrelbawlnaah Mizoram chu kum 34 lai state puitling a lo ni ta a, hetih chhung hian political economy ah kan la puitling lo hle, a ti a. Sawrkarna fawng vuantuten mipui hamthatna tur programme hrang hrang an duang thin a, harsatna hrang hrang avangin a duangtute duh angin an hlawhtlinpui thin lo hi a pawi hle a, hei hi kan intodelh lohna chhan pakhat a ni, a ti. Incheina, gadget, motor leh thil dangah te kan changkang a, intodelhna kawngah kan hnufum si hi kan inenfiah a ngai, Home Minister chuan a ti a. Hmasawnna nei tur chuan ngaihsan zawng, value system dik a pawimawh a. Kan hnam hi hnam zahawm, hnam intodelh kan nih theihna turin kan value system chhe mek siam that a tul tiin chumi siamtha thei tur chuan zirtirtute an pawimawh a ni, a ti. MIPSA life member leh kum tam tak lecturer hna lo thawk tawh Pu Lalchamliana chuan kum sawmthum chhung zet zirtirtu hna a lo thawh tawh thu leh a tawn hriat te sawiin, hlimawm leh lungawithlak a tih thu he hunah hian a sawi lang bawk.

Mizoram Political Science Association hi February 16, 2004 khan a lo ding tan a. Live member 82 nei mekin an zingah hian political science subject teacher te bakah eizawnna hrang hrang vuantu, he subject a tui te pawh an tel a ni. MIPSA hian kum hnih danah hruaitu an thlang thin a. Hripui leng vangin inthlan hun bi tukah an inthlan theih tak loh avangin hruaitu ni lai te hun pawhsei a ni a. Vawiin hian kum hnih dang atan hruaitu thar an thlang chhuak leh dawn a ni.

Vawiin programme hi Pu Zothlanpuia, President, MIPSA chuan a kaihruai a. Prof. J.K. Patnaik, Pro-Vice Chancellor, MZU chuan keynote address a sawi a ni. MIPSA Conference leh election neih chhunzawmin chawhnu lamah mithiamte kaihhruaiin thupui hrang hrang thlan bik hmangin zirhona hun an hmang a ni.