No.2779/2021-2022

Aizawl the 29th October, 2021: Vawiin chawhma khan Zaingen YMA Hall, Khawzawlah Lead Bank Office, State Bank of India leh NABARD ten Credit Outreach Program an buatsaih a, he hun hi Pu C.C Lalchhuangkima, Deputy Commissioner, Khawzawl District chuan a hmanpui a ni.

He hunah hian Khawzawl District Bawrhsap chuan thu sawiin, Mizo mipui nawlpuite chuan sum leh pai vawn leh dehchhuah dan (financial literacy) kawngah zirtur kan la ngahin kan la hre thuk lo hle a ni, a ti a. Covid-19 hrileng avangin State sawrkar sum leh pai a tlahniam nasa a, chuvangin mimal leh chhungkaw tinin nasa takin hma kan lak a ngai lehzual a ni a ti a. Hemi kawnga mimal leh pawl anga hmala duh ten bul an tanna turin Central Sawrkar-in program tha tak tak duangin, kawngsir a thil zuar (street vendor) te tan pawh bul tanna tur scheme tha tak a siam a. Heng scheme hrang hrang hrechiang duhte tan Bank lama thawkte zawt hreh lo a, pan thin turin kalkhawmte a chah bawk a ni.

Khawzawl District Bawrhsap chuan sawi chhunzawmin, Khawzawl District chu District taima, bultanna a awm phawt chuan tipunga, nasa taka hma sawn thei tura theihna nei a ni tih tarlangin, District chhunga Tomato ching leh Lakhuihthei chingte pawhin an hmalakna tizau turin Bank atanga bultanna awm theite chu hmang tangkai se a duh thu a sawi lang bawk.

Vawiina Credit Outreach Program buatsaih hi Pu Jyoti Munna Soren, LDM & Convener, Lead Bank Office Champhai chuan a kaihruai a. Pi H. Lalhmachhuani, DDM, NABARD Champhai leh Pu Lalhimpuia, Branch Manager, SBI Khawzawl te hnen atangin sawrkar laipui scheme pawimawh tak tak, Bank kaltlanga hamthatna loan lak dante leh credit scheme dangte he hunah hian ngaihthlak a zirho a ni a, zawhna leh chhanna hun hlawkthlak tak hman chhunzawm nghal a ni bawk.

He hunah hian Line department hotute, Khawzawl khawchhunga Bank hrang hrang hotute, VC, YMA leh Chanchinbumite an tel a ni.