No.4150/2021-2022
Aizawl Vau thla ni 1, 2022: Lawngtlai Bawrhsap Dr Andrew H. Vanlaldika hma laknaa National Scheduled Tribes Finance and Development Corporation (NSTFDC) atanga Lawngtlai District-a COVID-19 hri leng dopuina leh hriselna kawnga mamawh phuhrukna tura Ambulance dil chhuah chu vawiin khan Lawngtlai Bawrhsap Dr Andrew H. Vanlaldika chuan tangkai taka hman atan Lawngtlai Chief Medical Officer Dr LP Malsawma kutah a hlan.

Ambulance inhlan chhawnna puala Lawngtlai Bawrhsap pisaa hun hmanah Bawrhsap Dr Andrew H. Vanlaldika chuan Lawngtlai District mamawh an thlente ngai pawimawha NSTFDC te'n Ambulance an rawn pek avangin lawm thu a sawi a, hriselna kawnga Lawngtlai District hmasawnna tur leh harsatna hrang hranga chhawk zangkhaitu a nih a beisei thu a sawi.

Ambulance inhlan chhawnna hunah hian district administration official-te, medical lam official-te, DRDA Project Director, Additional SP leh DIPRO te an tel a. Ambulance chabi leh document pawimawh hrang hrangte chu Bawrhsap chuan CMO kutah a hlan nghal a. CMO chuan District Bawrhsap hma lakna avangin lawm thu a sawi bawk a ni.

NSTFDC hi Govt of India Ministry of Tribal Affairs hnuaiah kum 2001 khan Scheduled Tribe te hmasawnna tura sum leh pai leh kawng hrang hranga tanpuitu pawl angin din a ni a. India rama Scheduled Tribe-te hmasawn nan theih tawpin hma an la reng a ni.

Tun tuma NSTFDC-in Lawngtlai District tana Ambulance an pek hi cheng nuai sawm (Rs 10,00,000/-) chuang man a ni a. Nikum (2021) September thla atang khan District Administration hma laknain Corporate Social Responsibility (CSR) kal tlangin state pawn company leh foundation hrang hrang atangin Lawngtlai District chuan tanpuina cheng nuai sawmnga hu vel a dawng tawh a ni.

Tanpuina dawn tawhte chu - Act Grants, Bangalore atangin September, 2021-ah oxygen concentrator 10; NEAID leh Crypto Relief India atangin November, 2021-ah damdawi, PPE leh oxymeter thahnem tak; Akshaya Patra Foundation, Guwahati atangin November, 2021-ah happiness kit 1,916; Every Infant Matters, New Delhi atangin January, 2022-ah kawmawl (blanket) 250; Indian Red Cross Society atangin February, 2022-ah hygiene kit 162 leh NSTFDC, New Delhi atangin February, 2022-ah Ambulance te a ni.