No.4149/2021-2022
Aizawl, the 1st March 2022: Governor Hari Babu Kambhampati chuan Raj Bhavan-ah Mizoram Rural Bank (MRB) hotute a kawm a. He hunah hian Pu Vadde Jaya Chandra, Chairman, Pu C.Ramdinsanga, General Manager leh hotu dang te MRB aiawh in an tel a. Governor hi Mizoram chhunga an hmalakna leh mipui tana an rawngbawlna te bakah an hmachhawp te an sawipui a ni.

Governor Hari Babu Kambhampati chuan mitin ban phaka Bank dah tur leh a mamawhtu leh a dawng tur ten sawrkar tanpuina sum leh paia an dawn theih na tura MRB hnathawh chu fakawm a tih thu a sawi a. MRB chuan Mizoram mipui nuai 12 zinga a tam zawk te tan Bank Account nuai 9 lai tha taka an enkawl avangin Mizorama Bank awm zinga a pawimawh ber pawl a nih thu te leh an mawhphurhna pawh a sang bik tih a sawi a ni. Mizoram hmun kilkhawr zawkah te Bank hawn an tum tih a hriat thu leh hmasawnna thlentu pawimawh tak an nih tur thu pawh a sawi a. Heng an hnathawhna te hi fak a phu rualin Mizoram chhunga Bank te tanlak an la ngai a; Bank zinga inzarpharh zau ber MRB chu hmahruaitu ni turin a chah a ni.

Pradhan Mantri Suraksha Bima Yojana (PMSBY) – kum khata Rs 12/- chauh senga Insurance scheme neih theih, chhiat tawh thulh a chhungte tana pawisa tam tak dawn theihna te, Pradhan Mantri Jeevan Jyoti Bima Yojana(PMJJBY) – kum 18 leh kum 50 inkar tana kum tin a Rs 330 senga insurance scheme neih theih, chhiat tawh thulh a chhungte tana sum tam tak lak theihna te leh central sawrkar hnuaia scheme tha tak tak te chu Mizoram mipui ten ana la hrechiang lo a. Hei hi ngaihthah chi a nil ova, Mizoram mipui ten an chanvo dik tak an dawng ngei tur a ni a ti. Tunah hian Mizoram mipui tam zawkin scheme tha tak atanga tanpuina an dawn tur te hi an hmelhriat loh avangin dil nachang an hre lo a. Bank lam te leh Nodal department hrang hranin anmahni kaltlanga scheme awm thei mipui zirtirna an pek uar a ngai a ni a ti. Governor chuan Mizoram chuan NGO te an chakin sawrkar an thlawp tha hle a. Hei hman tangkai a tul thu sawiin Awareness campaign kalpuina atan bank lam an in daih loh pawhin tlawmngai pawl hrang hrang leh kohhran ten Bank ho chu thawhpui an inhuam ngei a rin thu pawh a sawi bawk a ni.

Pu Vadde Jaya Chandra, Chairman , MRB chuan Mizoram Governor hnenah Mizoram Rural Bank chu Mizoram mipuite ta a ni a, MRB a pawisa dahluh te pawh Mizoram tan chiah tangkaia hman tura pek chhuak a ni a, private bank te angin Mizoram pawnah Mizoram chhunga sum deposit te thawnchhuah a ni ve lo a ni a ti a. Mizoram hmun kilkhawr ber berah Mizoram mipui tan rawngbawl hna an thawk zel dawn a; Bank awmloh na hmun te pawh an zir chian tawh thu leh Bank hawn belh zel an tum thu a sawi a ni. Tunah hian MRB chuan sawrkar department zinga tlem te chiah customer a nei mek a; mi hausa leh sum ngah customer an neih tam loh thu leh an customer tam ber chu thingtlang mi leh sum thawhchhuah nei tlem zawk te an ni a ti a. Sawrkar department lian tak tak te pawh MRB chuan Bank dang tih theih ang a tih theih vek avanga dawr tura an beisei thu a sawi bawk a ni.

Pu Jaya Chandra chuan hnathawh, hlawhtlinna leh hmachhawp te Powerpoint hmangin an tarlang chunzawm a. Tunah hian MRB chu District 11-ah an inzarpharh vek tawkin branch 97 an nei mek a ni. A sum tam lam chhutin MRB chu tunah hian Bank Loan pechhuak tamber dawttu niin bank loan hrim hrim pek chhuah zatah phei chuan MRB hi a pechhuak tam ber an ni mek a ni. January 2022 thleng khan MRB CR Ration chu 58.39 % niin Mizoram a Bank ho CD Ratio chawh rual aiin a tam zawk daih a, Mizoram puma Bank a sumdahluh zawng zawng atanga chhut a 29.88% chu MRB ah hian dahluh a ni a; Mizorama puma Bank atanga customer hnena sum puktir zata atanga chhut a 33.36 % lai chu MRB in a puk tir a ni. Tunah hian MRB hian 2,53,097 PMJDY account nei mekin he account nei tam ber a ni bawk a ni.

MRB hi India ramah Regional Rural Bank(RRB) zingah Productivity per Branch ah pakhatna a ni mek a. Kum 2020-21 chhung khan MRB hian hlep hlang Rs 38.55 crore a thawk chhuak a, North East India a RRB zingah pahnihna a ni. MRB chuan kum 2023 ral hma in Customer Service Points(CSPs) neih hman, District 11 chhunga khaw pakhat zel Model Village a siam leh Mizoram chhunga Brach 100 neih hman te pawh an tum a ni.