74/2022-2023

Lawngtlai Ṭau thla ni 7, 2022: April ni 18 - 29, 2022 inkar chhunga India ram puma block level health mela buatsaih tura ruahmanna bawhzui dan tur ngaihtuahin vawiin khan Lawngtlai District Level Committee chu an Chairman, Lawngtlai Bawrhsap Dr Andrew H. Vanlaldika hovin a office chamber-ah an ṭhu khawm.

Chairman Dr Andrew H. Vanlaldika chuan block level health mela buatsaih tura ruahmanna chu District mipuite tan thil lawmawm tak nia a hriat thu a  sawi a. A taka buatsaih a nih hunah a ṭangkai thei ang bera chhawr tum turin District mipuite a chah a ni.

Member Secretary, District Hospital Lawngtlaia District Medical Superintendent Dr Zothanpari Chhakchhuak chuan block level health mela buatsaih dan tura kaihhruaina leh ruahmanna duan sa a sawi fiah a. Lawngtlai District chhunga block pali-a hun hman dan tur sawi ho zui a ni.

Ruahman lawk dan chuan health mela-ah hian mipui tan inentirna leh damdawi man a thlawn veka kalpui tur a ni a. Stall hrang hrang - inkai chhawn theih loh natna (non-communicable disease) lam te, zuk leh hmuam kaihhnawih (tobacco) lam te, rilru hriselna (mental health) lam te, HIV/AIDS kaihhnawih (MSACS) lam te, hri danna pekna (vaccination) hmun te buatsaih a ni ang a, Ayushman Bharat Digital Mission hnuaia India khua leh tui tinin hriselna kaihhnawih ID hran (Unique Health ID) an neih tur atana lo inziah lawk theihna te pawh kalpui tum a ni a. Specialist leh daktawr thiam tak tak chu mipui rawn theih turin clinic hawngin an ṭhu dawn bawk a ni.

Block level health mela neih turah hian Lawngtlai Block atan chuan April ni 18, 2022 (Thawhṭanni)-ah Lawngtlaia Government Region Higher Secondary School-ah  health mela hi buatsaih a ni dawn a. Zing dar 9:30-ah hawnna hun tawi te hmangin, nilengin kalpui a ni dawn a ni.

Hetia ang bawk hian April ni 21 (Ningani)-ah Chawngte Block tan Chawngte-ah, April ni 22 (Zirtawpni)-ah Bungtlang 'S' Block tan Bungtlang 'S'-ah leh April ni 26 (Thawhlehni)-ah Sangau Block tan Sangau-ah te health mela hi buatsaih tura ruahman a ni.

Vawiin ṭhut khawm zawh hian Lawngtlai District Administration-in Sustainable Environment and Ecological Development Society India (SEEDS India) leh MedGlobal ṭang kawp hnen aṭanga damlo enkawlna hmanrua leh damdawi an dawn chu Lawngtlai Bawrhsap chuan District Hospital Lawngtlaia hman atan thawktute kutah a hlan nghal a ni.

MedGlobal leh SEEDS India te hnen aṭanga thilpek dawn hi damlo, a bikin, thawkna lama harsatna neite enkawlna tur  Portable Ventilator pahnih, BiPAP pasarih leh thawk lama harsatna neite enkawlna tur damdawi chi hrang hrang a ni a. A zavaiin cheng nuai 24 man hu vel a ni.

Attachment

  • Loading attachment...