73/2022-2023

Lawngtlai Ṭau thla ni 7, 2022: Mizoram sawrkar flagship programme, Socio-Economic Development Policy (SEDP) kal tlanga kum 2022-2023 chhunga Lawngtlai District aṭanga Agriculture Department hnuaia vaimim chîng tura thlan chhuahte hnenah tukin zingkar khan Lawngtlai East Bialtu MLA, Agriculture Development Board Vice Chairman Pu H. Biakzaua chuan vaimim chi semin, Lawngtlai District chhung hmun danga sem tur vaimim chi a vai liam nghal.

Lawngtlai Electric Venga Agriculture Complex-a vaimim chi sem chhuahna hun buatsaihah Pu H. Biakzaua chuan COVID-19 hri leng vangin sawrkar flagship programme SEDP chu ruahman anga kalpui theih lohvin rei tak a awm tih sawiin, kuminah a rûnpui anga kalpui a, department hrang hrang hnuaia trade hrang hrangah nasa taka hma lak tum a nih thu a sawi a. Kuminah department hrang hrang hnuaiah chhungkaw sing ruk aia tlem lo hnenah SEDP pek chhuah tum a ni, a ti.

Agriculture chu Mizoram mipui tam zawk innghahna a nih avangin sawrkarin a ngai pawimawh hle tih sawiin, Pu H. Biakzaua chuan Chief Minister leh Agriculture Minister te hma laknain department dang aiin Agriculture Department-ah SEDP sum pawh tam zawk dah a nih thu a sawi a. Vaimim chu mihring ei atan bakah ran chaw atan pawh hmanna tur tam tak awm, kawng hrang hranga sawngbawl theih a nih thu sawiin, Lawngtlai District chhunga vaimim chîng tura thlan chhuahte chu District intodelh ni tura ṭan la turin a chah a, hlawk taka thar chhuak turin duhsakna a hlan nghal bawk a ni.

Vaimim chi sem chhuahna hun hi Lawngtlai District Agriculture Officer Pu Lalringliana'n a kaihruai a. Vaimim chîngtu kal khawmte hnenah vaimim chîn dan tur zirtir nghal a ni. District chhung khawchhak lam leh khawthlang lama vaimim chi sem tur phurh chhuahte pawh sem rualin a chingtu turte hnenah a chin dan tur zirtir a, kaihhruaina bu pe tel nghal zel tura ruahman a ni bawk.

SEDP hnuaia vaimim chîng turte hian vaimim chi hi kg 20 zel an dawng dawn a. A hmun hectare 1-a zauva chîn tur a ni. Vaimim chi bakah hian silpauline te, lei ṭha te, thlai venhimna tur hlo leh a kahna hmanrua te leh a chîn aṭanga a seng thlenga senso phuhrukna tur sum fai te pawh an dawng dawn a ni.

SEDP kal tlanga Lawngtlai District chhunga Agriculture Department hnuaia vaimim chîng tur hian mi 1,735 thlan phawt an ni a. Agriculture Department hnuaiah hian SEDP kal tlangin bekang chîn pawh kalpui tura hma lak mek a ni bawk.