72/2022-2023
Dated Serchhip, the 7th April, 2022: Vawiin khan Pu R. Lalzirliana, Minister, P&E, Art & Culture, etc., chuan Serchhip leh Chhiahtlang inkar Bukpuia P&E Department ram Serchhip District Hospital thar sak nana thlithlai mek a tlawh a, mipuiten kan mamawh em em district Hospital thar sak nan hian P&E Department chuan phal takin ram an pe dawn a ni a ti.

Minister chuan, P& E Department chuan helai hmun hi hun rei tak a lo enkawl tawh a. Nimahsela Khum 100 awmna tur Hosital atana dilna te kan lo dawng a, mipui aiawh pawl hrang hrang intel khawm NGO coordination te leh Serchhip Thalai Pawlte pawhin an duhna te an rawn sawi bawk a. Serchhip mipuiten rilru zau leh hmathlir thui tak nei chunga helaia Damdawiin sak an duh hi fakawm ka ti hle a ni. Tin, mi thenkhat mahni ram enkawl mekte hmasawnna hnathawh nana hman remti lo te pawh awm ve theih a ni a, keini erawh chuan he hmasawnna thar lo awm tur atan hian kan inhawng hle a ni, a ti. Hmunhma inhlan chhawn nan hian Cabinet pawmpuina a ngaia, Cabinet Agendaah kan lo dah anga, Cabinet pawhin a pawmpui ngei ka beisei a ni. P&E department chuan phal takin helai hmun hi Damdawiin atan hian kan pe dawn a ni, a ti. Serchhip District in District Hospital thar a neih theih nana theihtawp chhuahtu Dr. Renu Sharma, IAS, Chief Secretary hmalakna leh inpekna fakawm a tih thu sawiin, ani hmalakna zar hi kawng dangah pawh kan la zo zel dawn niin a langa a lawmawm hle a ni, a ti bawk.

Er. Lalrinawma, Dy. Speaker pawhin thusawiin, khum za awmna tur District Hospital thar, hmun rem tha leh zau nuam taka kan sak theih nana P&E department ten hmun min pe thei tur hi kan lawm hle a, lawmthu ka sawi a ni, a ti.

He hunah hian Serchhip NGO Coordination Chairman Pu R. Kawlthuama pawhin thusawiin, P& E department in an rama District Hospital sak an phalsak chu lawmawm a tih thu leh a tir atanga theihtawp chhuahpui thintu Er. Lalrinawma, Dy. Speaker leh Tuikum bialtu MLA chungah lawmthu a sawi bawk.

Minister hi Er. Lalrinawma, Dy. Speaker leh Tuikum bialtu MLA ni bawk te, Pu H. Lalengmawia, Commissioner & Secretary, P&E leh Pu Lalbiaksanga, CE, P&E ten an tawiawm a. Serchhip bawrhsap Pi Nazuk Kumar, IAS leh Serchhipa Health Department officers te, khawtlang hruaitu leh tlawmngaipawl aiawhten an lo dawngsawng a ni.