4272/2024-2025

Lawngtlai, 17th February 2025 : Vawiin chawhma dar 11:00 khan March ni 7, a Chapchar Kût hman dan tur rela thutkhawm DC Conference Hall- ah neih a ni a. Pu Zoramsiama Hmar, Additional Deputy Commissioner, chuan thutkhawm hi a kaihruai.

Pu Zoramsiama Hmar chuan kalkhawmte chibai bukna a nei hmasa a.  Pi leh Pute hun atanga urhsun taka Chapchar Kut hman a nih thin thu sawiin, Lawngtlaiah pawh ropui leh hlawhtling taka hmang tura hmalak mek a nih thu a tarlang a. Chapchar Kût hmanna turah mawhphurhna hrang hrang siam a nih leh dawn thu sawiin; mahni mawhphurhna theuh ngaipawimawha tihlawhtling theuh tura chahin, Lawngtlai mipui zawng zawngte Chapchar Kût hmanna a tel turin a sawm nghal bawk.

Thutkhawmah hian Chapchar Kût lawmna tura thil pawimawh hrang hrang sawi leh rêlho a ni a. Chapchar Kût hmanna tur hmun atan DC Office kawt zawl thlan niin, Kût thlengtu atan Pu Cheemala Siva Gopal Reddy, IAS, Lawngtlai Bawrhsap ruat niin, Kût Pa atan Dr. Lorrain Lalpekliana Chinzah, Adviser to Chief Minister chu beisei a ni a, Rev. C. Zaihmingthanga, (Presbyterian) chu hunserh  hmang tura beisei a ni bawk.

Kimchang zawka Chapchar Kût hman a nih theih nan   Addl. Deputy Commissioner kaihhruaina hnuaiah  'Working Committee ' din nghal a ni a. He Committee hian-  Sound and light, Photo booth, Live Coverage, Compere, zai tur, Hnam lam  entir tur leh programme kimchang zawk an lo duang leh dawn a ni.

Vawiin thutkhawmah hian sawrkar department hrang hrang hotute, NGO aiawh leh MJA, Lawngtlai aiawhte an tel thei a ni.