Vawiin khan Lawngtlaia CYLA Hall-ah World Vision India (CADP) leh Lawngtlai District Disaster Management Authority (DDMA) tang kawp chuan task force member-te tan chhiatna thlen thulha inven dan leh hma lak dan tur zir hona an buatsaih. 

He hun hi DDMA Nodal Officer Pu Lalrinawma MCS chuan a hmanpui a. Chhiatna laka inven dan hriat (disaster management) hi a pawimawh telh telh dawn a; chhiatna a lo thlenin, mi tam zawk chu kan chi-ai thin a, chuti ang huna buai lo tur leh tih tur kan hriat zung zung theih nana inzirtir hi kan uar deuh deuh a tul a ni, a ti a. Training buatsaih a ni chu lawmawm a tih thu sawiin, training tura kalte pawhin uluk taka zir turin a chah. 

He hun hi World Vision India (WVI) atangin Pu Thanglunpaua Guite chuan a kaihruai a. Manager (Programme) Pu Paul T. Touthang chuan kal khawmte lawmna thu sawiin, Development Facilitation Coordinator Pu Nehemia Infimate chuan thupui a sawi hawng a. Lawngtlai Fire Brigade-in fire drill & mi chhanchhuah dan entirin, District Hospital-a Medical Officer Dr Lalmalsawma leh WVI Manager (Disaster Risk Reduction) Pu Andrew Devarajan te'n zirtirna an pe a. Strategic Alliance and Monitoring Coordinator Pu Lalramliana Ngente chuan lawm thu a sawi bawk. 

He training-ah hian Chhimtuipui area-a cluster hrang hrang 5 - Tuipang, Siaha, Bungtlang S, Chandmary leh Lawngtlai cluster atangin disaster task force member-te koh khawm an ni a. An thil zirte hi anmahni hmun theuhva chhawr tangkai a, mi dangte pawh zirtir chhawng leh thei tura beisei an ni.