1759/2022-2023

Thlazing ni 31, 2022: Mizoram Sawrkar Environment, Forests & Climate Change (EF&CC) Department hnuaia Chhimtuipui Wildlife Division, Lawngtlaiin ram humhalh lai an enkawl pahnih - Ngengpui Wildlife Sanctuary leh Phawngpui National Park chhehvel khua (fringe village)-a chhungkaw khawsak harsa thlan chhuahte hnena pressure cooker sem tur chu tukin zingkar khan Lawngtlai East Bialtu MLA, Agriculture Development Board Vice Chairman Pu H. Biakzaua chuan Lawngtlai College Venga EF&CC office complex atangin a vai liam.

Pressure cooker sem chhuahna hun buatsaihah Khuallian Pu H. Biakzaua chuan khawvel pumin leilung leh chhevel boruak (environment) venhim leh siam that lam a buaipui tih sawiin, ramngaw chereu zel chuan a chhe zawnga nghawng tam tak a neih vanga buaipui ngai a nih thu a sawi a. Mihringte tana boruak vawng daitu leh boruak tha siamtu, tui hna siamtu, nungchate tana chenna leh ei tur petu thing leh mau leh ramngaw chu tichereu lo va, humhalh leh siam belh zel a tul tak zet tih a sawi. EF&CC Department-in ramngaw humhalh tura a thua mipui zirtir mai duh tawk lo va, ei rawngbawlna tur tuahthing atana ngawa innghat mipui khawsak harsa zawkte tanpui paha ngaw an rinchhanna tiziaawm tura hma lak nachang an hria chu remhria a tih thu sawiin, pressure cooker dawngtute pawh an dawn chhan hre chiang a, ramngaw humhalh kawnga ke pen turin a chah a ni.

He huna khual zahawm, Lai Autonomous District Council (LADC)-a Chief Executive Member Pu V. Zirsanga pawhin thu sawiin, thingtlang chhungkaw khawsak harsa zawkte tana hun rei lo zawk chhunga chaw tui zawka chhum hmin theihna pressure cooker a thlawna sem a ni chu lawmawm a tih thu a sawi a. Sem chhan tihlawhtling turin ramngaw humhalh leh siam belh (afforestation) lamah thlen chin atanga hmasawn zel turin kal khawmte leh beneficiary-te chu a sawm a ni.

He hun hi Chhimtuipui Wildlife Division-a Deputy Conservator of Forests (Wildlife) Pu C. Lalrinmuana chuan kaihruaiin, pressure cooker sem chhan leh sem tura an buaipui chhoh dan a sawi a. Head Assistant Pu DC Lalthanzama chuan lawm thu a sawi bawk.

Hemi hnu hian Khuallian chuan pressure cooker sem tur, a semna tur khaw pana motor lianin a phurh chu a vai liam a. A hmunah hian Lawngtlai College Veng atanga cooker dawng tura thlante hnenah Khuallian, khual zahawm leh official dangte'n pressure cooker hi an sem nghal bawk.

He hunah hian sawm bik LADC-a Executive Member leh Member of District Council-te bakah, sawrkar official-te, MJA ai awh, PPA ai awh, political party hruaitute leh beneficiary-te an kal khawm a ni.

Tun tuma EF&CC-in thingtuah mamawh zat tihniam theitu pressure cooker an sem hi Compensatory Afforestation Fund Management and Planning Authority (CAMPA) hnuaia Annual Plan of Operation 2020-21 a?anga sum dawn atanga ruahman a ni a. Ngengpui Wildlife Sanctuary chhehvel khaw 13-a chhungkaw 620 leh Phawngpui National Park chhehvel khaw 11-a chhungkaw 580, an zavaiin chhungkaw 1,200 hnenah pressure cooker pahnih theuh - litre 3 leh litre 5 sem turin an ruahman a. He'ng khaw tin atanga a dawng thei tur beneficiary hi mipui awm zat atanga chhutin sem rual a ni.

Attachment

  • Loading attachment...