1760/2022-2023

Dated Serchhip, the 31st August, 2022: Vawiin khan Chhungkaw Pual Socio-Economic Development Policy (Family Oriented SEDP) Serchhip District hawnna inkhawm DC Conference Hall ah buatsaih a ni a. Pu Lalchamliana, Home Minister chu khuallian a ni.

Pu Lalchamliana chuan, Family Oriented SEDP Serchhip district a tluang taka a kal theih nana thawktute, District Level SEDP Committee leh Village Level Committee te chungah lawmthu sawiin an kal zelna turah duhsakna a hlan a. Tuna thawhkhatna Rs. 25,000 sem mek hi Line Department ten September leh October inkarah an sem zawh hman kan beisei a, kumin December leh nakkum January chhovah a thawh hnihna Rs. 25,000 dang pek leh hman tum a ni, a ti. Tuna Family Oriented SEDP Rs. 50,000 sema bul kan tan hi kan duhkawp atam a ni rih bik lova, sum leh pai kan neih milin kan kalpui rih mai zawk a, hei aia tam hi sem theih hi kan duh em em a ni. Sum leh paia kan dinhmun azir zelin sem chhunzawm zel kan tum a ni tih hi kan ram mipuiten min hriatsak se ka duh a. Kut hnathawktute khai chhuaha dinhmun duhawm zawka chawisan hi sawrkar chuan mutmawh hnarmawh ah a nei a ni, a ti. Sawrkarin tanpuina min pek hi diklo takin kan hmangin, a nih dan tur angin kan kalpui lovang tih kan hlau hle a. A dawngtu chhungkuaten dik taka lo hmang ngei a;  a enzuitu tur Committee te pawhin tha taka lo umzui turin ka ngen che u a, hmasawnpui ngei kan tum dawn nia, tiin Minister hian a dawngtute leh District Level leh Village Level Committee te, Line Department te a chah a ni. Thusawina a neih zawh hian khuallian hian a dawng tura thlan chhuah te hnenah leh Village Level SEDP Committee te inenkawlna tur (Admin Cost) bank lehkha (Token) in a hlan a, a dawngtute hian Bank kaltlang zelin pawisa hi chu an dawng dawn a ni.

Inkhawm hi Pu Malsawmtluanga, Project Director, DRDA, Member Secretary, SEDP District Level Committee ni bawkin a kaihruaia, Pi Nazuk Kumar, IAS, Deputy Commissioner, Chairman, District Level SEDP Committee in thusawina neiin, sawrkarin chhungtinte anmahni thiamna leh tuina lama eizawnna an thawh theih nana tanpuina a pe hi a lawmawm hle a, hma lam pan theihna hun remchang tha tak min pe a ni. A dawngtuten hmasawnpui ngei tumin hma kan la theuh dawn nia, tiin sawrkar hmalaknaah lawmthu sawiin a dawngtu turte dik taka hmang turin a fuih a ni.

Pu Lalmuansanga Ralte, Addl. DC in Family Oriented SEDP chungchanga district dinhmun tlangpui sawina a nei a. SEDP hi Assembly Constituency mil zelin kalpui a ni a, hei vang hian Biate khua pawh Khawzawl district ni mah se Hrangturzo Assembly Constituency chhung ami a nih avangin Serchhip District kal tlanga hmalakna kalpui a ni. Bial tinah chhungkaw 1,500 zelin dawng tura ruahman phawt a ni a, Serchhip district ah bial pathum awmin chhungkaw 4,500 ten  chhungkaw pakhat zelin Rs. 50,000 theuh an dawng dawn a ni. A thawhkhat naah Rs. 25,000 pek niin a thawh hnihnaah a dang Rs. 25,000 pek leh tur a ni ang. A thawhkhatna hi October thlaah tihfel hmana, a thawh hnihna buaipui zui leh tur a ni dawn a ni. Family Oriented SEDP hmalakna umzuina tur sum (Administrative Cost) hi Serchhip District tan Rs. 15,99,700 hmuh a ni a, vawiin hian heng Administrative Cost te hi khuallian hian Village Level SEDP Committee te hnenah a hlan a, beneficiary pakhatah Rs. 300 zela chhutsaka pek an ni.

Vawiin Family Oriented SEDP hawnna inkhawmah hian Sub Headquarters YMA zaipawl leh zaithiam dangten hun hmangin Pu Tlangtimawia Zote, DAO in lawmthusawin inkhawm a khar a ni.