1702/2024-2025

Dated Lawngtlai, 23rd August, 2024 : Vawiin khan Deputy Commissioner's Office, Lawngtlai District bultumin  'Citizen Care- Grievance Redressal Day' (Khua leh tuite Ngaihsak-Harsatna Chinfel Ni) chu DC Conference Hall ah hman a ni a. Pu Cheemala Siva Gopal Reddy, IAS, District Bawrhsap chuan he hun hi a hmanpui.

Pu Cheemala Siva Gopal Reddy (IAS) chuan Department hrang hrang dawr theiha inpho chhuak leh a dawrtu tur mipui lo kal khawmte hnena lawmthu sawina a nei hmasa a. Khua leh tuite harsatna chinfel sak chu sawrkar department zawng zawngte mawhphurhna a ni tiin, mipuite tana thawk an nihna hre reng turin deparment hrang hrangte chu a chah a. Mipuite tana hamthatna awm ang ang bakah an dikna chanvo humhalh leh mipuite mamawh pek kawngah Sawrkar hnathawkte chu  rilru siam thar turin a chah.

Lawngtlai District chu district lian tak nih avangin thingtlang lam atanga Office dawr thin ten sum leh pai tam tak bakah hun hlu tak an seng thin a, an thil duh leh mamawhte an tihfel nghal mai loh phei chuan harsatna lian tak a thlen thin a;  awlsam leh hun khawhral lo zawnga an mamawh an tihfel zung zung theih nan vawiin hun hman a nih thu Pu Cheemala Siva Gopsl Reddy chuan a sawi a. Khua leh tuite Ngaihsak-Harsatna Chinfel Ni - hian mipuite tan chauh ni lo in, department hrang hrangte pawhin awlsam zawkin mipute hnenah 'service' an pek theih ang angte an pe thei dawn a, mipui leh sawrkar department-te tan hlawkna a thlen dawn a ni, a ti. Pu Cheemala Siva Gopal Reddy chuan Sawrkar department hrang hrangte chu mipuite dawr nuam leh biak nuam taka awm a pawiawmh hle tih sawiin, Head of Department-te chu anmahni Office-ah theuh mipuite tana dawr nuam tura hmalak kawnga sulsutu ni turin a chah bawk. 

Pu Cheemala Siva Gopal Reddy (IAS) chuan 'Khua leh tuite Ngaihsak-Harsatna Chinfel Ni' chu thil pawimawh leh tangkai tak a ni  a ti a, hmalam hunah pawh hman chhunzel tura hmalak niin thlatin vawikhat neih thin a ni ang a ti a. ' Khua leh tuite Ngaihsak-Harsatna Chinfel Ni' hman a nih apiang a Department hrang hrang hotute tel ngei tura  chahin, Head of Department an tel thei lo a nih pawhin, mi rin tlak tak leh mipute dawr tlak department aiawh lo ruat thin turin a ngen a. 'Khua leh tuite Ngaihsak-Harsatna Chinfel Ni' ah mipui tam zawk an lo kal theihna turin he ni pawimawhna leh tangkaina puandarh kawngah thuthar thehdarhtute theihtawp chhuahpui turin a sawm nghal a ni. 

Vawiin 'Khua leh tuite Ngaihsak-Harsatna Chinfel Ni' puala hun hman naah hian Department 15 - Superintendent of Police (SP), Executive Engineer (PHE), Executive Engineer (P&E), Executive Engineer (PWD), Chief Medical Officer (CMO), Certificates under DC Office, Election Branch, District Transport Officer (DTO), District Commissioner of State Tax, District Civil Supplies Officer (DCSO)  leh BDO-Lawngtlai, Chawngte, Bungtlang South leh Sangau te, District Research Officer (DRO), District Education Officer (DEO) District Information & Public Relations Officer (DIPRO) leh  Lead Bank Manager (SBI)  te chu mipuite dawr theih turin dawh kan hrang hrangah an innpho chhuak thei a ni.

'Khua leh tuite Ngaihsak-Harsatna Chinfel Ni' hi mipuiten an hlutin an ngaipawimawh hle a, mi thahnem takin department hrang hrang inpho chhuak te hi dawrin, harsatna an neih ang angte an thlen nghal bawk.