COVID-19 hri danna (vaccine) lak theih a nih huna vaccine la tur leh pe turte'n harsatna an tawh loh nan vawiin khan District Hospital Lawngtlaiah vaccine pek chhuah dan tur enchhinna (dry run) buatsaih a ni.

He hun hi Lawngtlai Additional Deputy Commissioner Pi Marilyn Rualzakhumthangi hovin hman a ni a. Lawngtlai Chief Medical Officer Dr LC Liana, District Immunisation Officer Dr S. Thaizi   leh DHL-a District Medical Superintendent Dr Zothanpari Chhakchhuak te kaihhruaina hnuaiah vaccine pek dan tur enchhinna hi tluang taka kalpui a ni a. Vaccine la turte chu an lehkha pawimawh (document) te ngun taka endik a nih hnuah an hriselna tlangpui enfiah niin, innghah khawmna hmunah khung an ni a, heta tang hian hri danna lakna hmunah koh niin, hri danna pek an nih hnuah chawlh hahdamna hmunah darkar chanve chawlhtir leh an ni a. Hemi hun chhunga an taksaa harsatna an neih thulha rang taka buaipui an nih theih nan a hmunah doctor leh damdawi lam hmanrua chhawp nghal a ni bawk.

He'ng enchhinna zawng zawng hi khaihlak awm lovin tluang takin mi 50 chuangah enchhin a ni a. Vaccine hi a taka pek chhuah tur a awm hunah Lawngtlai District chhunga health care lama thawktu mi 1129 hnenah pek hmasak a ni dawn a ni.

Chief Medical Officer Dr LC Liana chuan COVID-19 hri danna chu mi thiamte'n an zir chian a, an endik vek a nih avangin hri danna la tur tan hlauhthawn tur a awm lo tih sawiin, hri danna an lak theih hunah kim taka la theuh turin mipuite a ngen a, hri danna lak chu hripui laka himna tur a ni, a ti.