No.7090/2020-2021 

Law & Judicial Minister Pu T.J. Lalnuntluanga, Champhai South bialtu MLA ni bawk chuan vawiin khan Champhai Town Planning kalpui mek hnuaia hmalakna pawimawh tak Champhai khawpui tuamchhuaka inkalpawhna kawngpui Ring Road Project siam hnuaia hmalak lehna tur, Tlangsam-Zote inkar kawngpui siam dan tur chu line department official-te leh khawtlang hruaitute nen an enfiah. 

Kawngpui siam dan tur enfiahnaah Law & Judicial Minister Pu T.J. Lalnuntluanga chuan khawvel changkang leh thang zelah hmathlir thui tak nei chunga khawpui tawt lutuk tur tiziaawm tura  Champhai Town Planning duan anih thu a sawi a. Hmalak awlsam hun bawhpelh lova a remchan lai tun hun zel chu  chhawr tangkai thiam a tul a, ramngaw  tichereu lo thei ang ber leh Leilet phaizawl humhalh chung zela hmalak tum a ni, a ti. Kawng siam hna thawktu tur leh a viltu department mi leh sate chu ram tana rohlu hnutchhiah tuma theihtawp chuah turin a chah a ni. 

Champhai Town Planning hnuaia Ring Road Project hmanga Tlangsam leh Zote inkalpawhna tur kawng sial thawhkhatna tur hi UD&PA Dept. kaltlanga thawh tur a ni a. A thawhkhatna hnuaiah Tlangsam atanga Zote panna kawngpui kilometre 4 vela thui chu metre 8 a zaua laih tum a ni a. Hemi bak kilometre 2.5 vela thui chu hmachhawp leh a tan dah a ni. Kawngpui siam hna hi a tul angte buaipui zawh anih veleh kumin thal chhung ngeia thawh tan hman tum a ni.  Ring Road Project hnuaia kutthlakna hmasa Champhai Zotlang leh Tlangsam inkalpawhna kawngpui kilometre 4.5 a thui laihzau leh siam that hna chu tunah hian zawhfel tawh niin white topping leh tura ruahman a ni. 

Tlangsam-Zote inkalpawhna kawngpui siam tur enfiah zawh anih hnu  hian Pu T.J. Lalnuntluanga chuan Champhai Venglai tlawhin, Official leh Village Council member-te nen Sub Centre tihchangtluna Bazar siam theihna turte, Venglai leh Bethel Veng inkalpawhna tur kawngpui siam anih theih dan turte a hmunah kalin an enfiah bawk a ni. 

Minister Pu T.J. Lalnuntluanga hi Pu Vanlalchhuanliana DUDO & SO Champhai, Pi R.Lalnunkimi BDO Champhai, Dr.R.Lianmawia CMO Champhai, Dr.Lallawmkima DIPRO Champhai, Pu Thangchhuana Pautu, SDO PWD Champhai, PWD JE te  leh  khawtlang hruaitu te’n an tawiawm a ni.