No.382/2021-2022

Lawngtlai, Tomir thla ni 3, 2021: Vawiin khan Lawngtlai District Task Force Immunisation (DTFI) chu an Chairman, Lawngtlai Bawrhsap Dr Andrew H. Vanlaldika hovin DC Conference Hall-ah an thu khawm a. Lawngtlai District-a COVID-19 hri danna (vaccine) pek mek chungchang leh hma lak zel dan tur an sawi ho.

He thut khawmah hian district administration, health department, police, CYLA leh Lawngtlai khawpui chhung veng hrang VLTF ai awhte an tel a. Member Secretary, District Immunisation Officer Dr S. Thaizi hnen atangin Lawngtlai District chhunga COVID-19 hri danna (1st dose leh 2nd dose) pek tawh dan report ngaihthlak a ni a. Hri danna pek chungchanga harsatna hrang hrang awmte leh tha zawk leh felfai zawka kalpui a nih theih nana rawtna hrang hrangte sawi ho zui nghal a ni.

COVID-19 hri danna chu January ni 19, 2021 khan Lawngtlai District-a healthcare worker (doctor, nurse, health worker, ASHA leh anganwadi worker & helper)-te hnenah pek tan niin, a hnu lamah sawrkar ruahmanna angin frontline worker te, kum 60 chung lam te leh kum 45 chung lam natna khirhkhan bik vei kawp te, kum 45 chin chung lam zawng zawng te pek chhunzawm a ni a. Kum 45 chin chung lam hri danna pek hi kalpui chhunzawm mek a ni.

He hunah hian harsatna chi hrang hrang avangin hri danna la thei tura ngaih chin hri danna la si lo an awm nual tih tar lan niin, he'ng harsatna chin fel dan tur leh mi tam zawkin hri danna an lak theih nana hma lak dan turte sawi ho a ni a. Hri danna la turte'n Voter ID Card leh Aadhaar Card ken chu ngaih pawimawh a tul thu tar lan niin, vawi khat inchiu (hri danna 1st dose lak) hnu chawlhkar 4 atanga chawlhkar 8 (thla 1 hnu, thla 2 ral hma) chhungin inchiu nawn (2nd dose lak) tur a nih thu tar lan a ni bawk.

Tun thleng hian Lawngtlai District-ah COVID-19 vaccine (1st dose) la tawh mi 10,586 an awm a, an zinga mi 2,255 te'n 2nd dose la tawhin, 2nd dose lak hmabak hi mi 8,331 an la awm a ni. Healthcare worker 1st dose la mi 850 zinga mi 713-in 2nd dose lain, dose la kim lo mi 137 an awm a. Frontline worker 1st dose la mi 1,258 zingah mi 619-in 2nd dose la tawhin, 2nd dose lak hmabak mi 639 an la awm a. Kum 45 leh kum 59 inkar hri danna 1st dose la mi 5,066 zingah mi 308-in 2nd dose la tawhin, 2nd dose lak hmabak mi 4,758 an la awm a. Kum 60 chin chung lam hri danna 1st dose la mi 3,412 zingah mi 615-in 2nd dose la tawhin, 2nd dose lak hmabak mi 2,797 an la awm bawk.