2786/2026-2027

Lawngtlai, 23rd October 2026 : Vawiin khan UD&PA leh WASH Institute - tangkawp buatsaihin BDO Conference Hall- ah Lawngtlaia Civil Society Organisation (CSO) leh Non Governmental Organisation (NGO)- te tana bawlhlawh enkawl dan tha leh changtlung zawk inzirtirna 'Capacity Building Training' neih a ni a. Bawrhsap Pu Donny Lalruatsanga chuan Khuallian niin a hmanpui.

Pu Donny Lalruatsanga chuan kalkhawmte chibai bukin faina leh thianghlimna kawnga rah tha chhuah ngei tura lawm taka 'Training' a hawn thu a sawi a. Supreme Court thuchhuak anga chi lia bawlhlawh thliar hrang  tur a nih angin, Lawngtlai khawpui chhunga Veng pathum leh Lawngtlai, Bungtlang South, leh Sangau RD Block - a khaw - 26 leh Chawngte RD Block - a Kamalanagar -I,II,III & IV - ah te theih ang anga kalpui mek a ni, a ti. Sawrkarin theihtawp chhuah thin mah se, mipui vantlang inpekna thûk zawk leh thawhhona tha zawk  a pawimawh hle tiin, lungrual taka thawkho turin a sawm a. Viksit Bharat (Developed India by 2047) hnuaiah faina leh thianghlimna chu a pawimawh ber pakhat a nih angin  sawrkarlaipui pawhin a ngaipawimawh hle a, Lawngtlai District- ah pawh theihtawp chhuah mek a nih thu a sawi.

Bawrhsap chuan a paihna hmuna bawlhhlawh paih te, Single Use Plastic hman tihtlem te, Compost pit mumal tak siamte, khawpui cheimawi leh a dangah te tan lak thar a tul hle a ti a. Mizoram Khawpui Faina inelna neih thinah Lawngtlai dinhmun a chhuanawm loh fo tih sawiin, kuminah hian dinhmun tha zawk neih ngei tum a ni, a ti. Hemi kawngah hian VC, NGO, SHG leh mipuite an pawimawh tak zet tiiin, thahnemngai taka ram leh hnam tana thawkchhuak turin a sawm a. Bawrhsap chuan faina leh thianghlimna kawnga rahbi thar kai tura uluk leh felfai zawka bawlhhlawh thliarhrang thin tura kalkhawmte leh Lawngtlai mipuite chahin hlawk taka training nei turin duhsakna a hlan nghal bawk.

Pu Laldingliana, District Coordinator leh Pi Singhmingthangi, Master Trainer - te chuan bawlhhlawh sawngbawl dan (Sustainable Solid Waste Management) chungchangah zirtirna an pe a. Zawhna leh chhanna hun hlawk tak hman nghal a ni.

Capacity Building Training- hi Pu Larry Lalramdingngheta (UD&PA) chuan kaihruaiin, BDO; Lawngtlaia CSO leh SHG- te an tel tha hle a ni.