2787/2026-2027

Dated Serchhip, the 23^rd October, 2026: Vawiin khan Serchhip District Aids Prevention and Control Committee chu an Chairman, Bawrhsap Pu Paul L. Khuma hovin an thukhawm a, HIV/AIDS chungchanga Serchhip District dinhmun leh hmalakna hrang hrangte thlir ho niin AIDS darh zel tur ven nana chak lehzuala hmalak dan turte sawi ho a ni.

Meeting-ah hian Dr. Zodinpuii Hrahsel chuan Mobilization for AIDS Suraksha Campaign chungchang presentation pein, National AIDS Control Organisation (NACO) in December ni 1, 2026 hmaa 95-95-95 target achieve tura a ruahman chungchang a sawi a. (95-95-95 awmzia chu target population atanga 95% ten an dinhmun an inhriat a, chung zinga 95% ten ART treatment an dawn a, 95% ten inenkawlna hmanga taksaa HIV hrikte an thunun tihna a ni)

Tun dinhmunah (October Report) Serchhip District dinhmun chu 95-95-95 goal-ah, 83.5 - 97-96 a ni a, 1^st 95 tih loh chu achieve vek tawh niin Serchhip District chu tunah Saksham Level-ah a awm mek a, HIV+ 943 an awm mek a ni.

Meeting hmasa leh tun inkara hmalakna te thlir ho a ni a, Govt. Serchhip College-ah Red Ribbon Club te nen tangkawpin October ni 15 khan Awareness leh Screening neih niin zirlai 91 te test an ni a, HIV positive an awm lo. District Hospital OPD-ah September ni 7 atanga October ni 12 chhung khan screening neih niin mi 376 te test an ni a, Oct ni 19 khan HIV positive pakhat hmuhchhuah a ni. Damlo admit-te pawh HIV test thin an ni a, Mobile ICTC hmangin High Risk khua-ah HIV test neih thin a ni bawk. April atanga September chhung khan Serchhip District-ah HIV positive mi 22 hmuhchhuah thar an ni bawk a. Jail chhungah te, High Risk ho punkhawmna hmunah te, Truck hubs leh Migrant labour awmkhawmna hmunah te Awareness Programme neih thin niin Jail hi thla tin tlawh thin a ni bawk.

Intensified IEC Campaign 3.0 chu September ni 7 atanga October ni 20 chhung khan kalpui niin October ni 20 thleng khan khaw 25 te cover a ni tawh a. He campaign chhung hian mi 225 te thisen test niin HIV positive hmuhchhuah an awm lo a, Syphilis pakhat hmuhchhuah a ni.

Hmalak zel dan turte rel niin, N. Vanlaiphai, Khawlailung, E. Lungdar leh Chhiahtlang khuaahte House-to-House HIV & Syphilis Screening neih te, Truckers, Taxi, Auto Rickshaw leh Sumo driver te hnena HIV & STI screening neih te leh High Risk Group ho hnena zan lama chhuaka HIV leh Syphilis test service pek chhunzawm te a ni.

Bawrhsap Pu Paul L. Khuma chuan lawmthu sawiin concerned department ten thawh hona tha vawng zel tur te, Documentation leh Action Taken Report te mumal taka siam chhunzawm zel  ni se tiin hun a khar a ni.

Meeting-ah hian Addl. DC Pi Dorothy Muansangi, Serchhip District Sr. Chief Medical Officer Dr. Lallawmpuii, Dy. CMO Dr. Lallawmkimi Chhakchhuak, ICTC hotute leh sawrkar mi pawimawh dangte an tel a ni.