Lawngtlai, Khuangchawi thla ni 28, 2020: Vawiin khan Lawngtlai District Consultative Committee (DCC), District Level Review Committee (DLRC) leh District Level Security Committee (DLSC) chu an Chairman, Lawngtlai Bawrhsap Dr Andrew H. Vanlaldika hovin DC Conference Hall-ah an thu khawm.

He thut khawmah hian Lead Bank Manager Pi Lalhlupuii leh NABARD Lungleia DDM Pu Evan T. Munsong bakah, bank hrang hrang leh line department ai awhte an tel.

Lawngtlai Bawrhsap chuan Lawngtlai District-in hma a sawn theih nan bank leh line department te an tan rual a, tha taka an thawh ho a pawimawh tih a sawi a. Bank lam chu mipui sum khawl an dawn rualin, loan pek chhuah lamah pawh inthlahdah lo va, tan la turin a chah a. Bank kal tlanga sum che vel chu District mipuite'n an chhawr theih dan tur ngaih pawimawh ber tur a ni, a ti.

He hunah hian kum 2020 January atanga June thla (4th Quarter 2019-2020 & 1st Quarter 2020-21) chhunga Lawngtlai District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho a ni a. Bank leh mipui sum vawn himna (security) lam te, pawisa leng vel (currency management & remittance) chungchang te, khua leh tuite hamthat nana sawrkar laipui ruahmanna hrang hrang - PMAY (Housing for All), Women Self Help Group, loan chi hrang hrang leh social security scheme lama bank hma lak dan te sawi ho a ni bawk.

He thut khawmah hian pawisa thir, a bikin ₹ 10 thir hman a harsat chungchang leh dawrkaite'n an dawn duh loh thin chungchanga harsatna awm sut kian dan tur sawi ho a ni a. ₹ 10 thir chu sawrkarin hman theih tura a siam chhuah a nih avangin dawn leh hman a hlauhawm loh thu tar lan niin, pawisa thir chu mipuia lengvak atana tih ni mah se, bank lam paw'n a theih ang anga dawng zel turin hriattir an ni.

He thut khawmah hian mi harsa zawkte leh kut hna thawktute hnena a tam thei ang ber sum puktir (loan pek) a, chumi hmanga an dinhmun chawi kan chu DCC-in a tum ber a nih thu tar lan niin, agriculture kaihhnawih loan pek chhuah a tam zawk theih nan line department leh bank lam te'n tan la se, tih a ni a. Hei bakah hian zirna kaihhnawih leh mipui hamthatna hrang hrang puanzar kawngah pawh bank leh line department-te'n tan la leh zual se, mipuiin loan lak theih leh sawrkar ruahmanna hrang hrang an hriat theih nan COVID-19 laka him nana sawrkar inkaihhruaina siam bawhchhe si lovin financial literacy camp (FLC) a tam thei ang ber buatsaih tum ni se, tih a ni bawk.

He hunah hian Lawngtlai District chhunga bank hrang hrang te'n kum 2020-21 chhunga loan an pek chhuah tur zat target tukna, 'Annual Credit Plan 2020-21' chu Chairman/Lawngtlai Bawrhsap chuan a tlangzarh nghal a ni.