No.6386/2020-2021 

Kolasib 28^th October 2020: Vawiin chawhma khan DC Conference Hall, Kolasibah Special Summary Revision of Electoral roll District Level Standing Committee-ten thutkhawmna neiin inruahman lawkna kalpui mek leh kalpui chhunzawm dan tur te an sawiho a, Village Council tharte tan Polling station awmna hmun tur te ruahman a ni bawk.

Dr. H.Lalthlangliana, District Election Officer chuan,”Electoral roll dik leh tha chu vote nei thei zawng zawngte kim tak a roll-a telh leh vote nei thei lo tur zawng zawngte roll-ah awm tir loh hi a ni,” a ti a, Electoral roll a voter an lo awm belh nual hian roll kha a rinhlehawm tihna ni lovin Roll revision kalpui chhunga kum 18 tling thar an awm vangte leh chhan hrang hrang avanga roll-a chuang ngei ngei tur, chuang lo, ziah luh thar an awm vang a ni thin a ni, a ti. DEO chuan Electoral roll buatsaihna kawngah Political party hrang hrangten mawhphurhna pawimawh tak an neih thu sawiin khua leh tui dik tak roll-a la chuang lote leh kum tling tharte Electoral roll-a inziahluh pawimawhna inzirtir a tul thu a sawi bawk a ni. Summary Revision kalpui chhunga dilna thehluh theih hun chhung hian hrileng lak a fimkhur a tul avangin Online a dilna theh luh uar tura mipuite zirtir a pawimawh thu DEO chuan a sawi a, online-a a tih theih loh chinah pawh mipui pung khawm tam lo zawng a ruahmanna siam thin turin ERO leh AERO-te a chah bawk a ni.

Pu. Vanlalchhuanawma Chawngthu, Election Officer chuan Election branch ah dilna lut 3761 a awm thu leh a tam zawk chu tihfel tawh a nih thu a sawi a, tihfel mek 29 la awmin chhan hrang hrang avanga dilna hnawl 49 a awm thu a sawi bawk. 

Integrated Draft Electoral Roll hi ni 16.11.2020 a tlangzarh tur a tih a ni a, hemi ni atanga ni 15.12.2020 thleng hian Electoral roll a ziah luh, siamthat leh paih dilna thehluh hun hawn a ni ang. A tul ang angte siam rem a nih hnuah ni 20.01.2021 ah Electoral roll thar tlangzarh tur a ni.