4520/2024-2025

Dated Lawngtlai, 4th March 2025 : Vawiin chawhma khan Lawngtlai District Consultative Committee (DCC), District Level Review Committee (DLRC) leh District Level Security Committee (DLSC) for the Quarter Ending December, 2025 chu Pu Zoramsiama Hmar, Addl. Deputy Commissioner, kaihhruaiin  DC Conference Hall-ah an ṭhukhawm.

Pu Zoramsiama Hmar chuan Bank hrang hrang aiawh lokalte hnena lawmthu sawina a nei hmasa a. Bank te chu Lawngtlai mipuiten an mamawhna hriaa an tana luangchhuak fo thin turin a chah a. A bik takin mipuiten awlsam zawka Loan an lak theihna tur leh hamthatna an neih ang angte hrilhhriatna turin Financial Literally Campaign (FLC) chak taka kalpui a tul hle a ti a. Bank te chu FLC nei ngei ngei thin tura chahin, a tul dan ang a sawrkar line department hrang hrangte nena thawkho thiam turin a sawm a. Pu Zoramsiama Hmar Social Security Schemes hrang hrang- PMJDY, PMJJBY, PMSBY leh a dangte hnuaia loan pek chhuah tur target an neihte tihhlawhtling ngei turin a chah. 

Pu Zoramsiama Hmar chuan NABARD buatsaih lehkhabu 'Potential Linked Credit Plan 2025 - 2026' tlangzarhna a nei nghal bawk.

He ṭhutkhawmah hian Lead Bank Office-a Lead District Manager (Lawngtlai & Siaha) Pu JM Soren leh Reserve Bank of India (RBI) aiawh bakah, bank hrang hrang leh line department ai awhte an tel a ni.

He hunah hian meeting hmasa, December ni 3, 2024-a DCC meeting minute chu pawm a ni a. Kum 2024   chhunga Lawngtlai District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho nghal a ni.

He hunah hian Financial Unclusion Plan (FIP) hnuaiah Lawngtlai District chhunga mihring 2,000 chunglam  chenna khaw tinah mipuiin bank kal tlanga hamṭhatna hrang hrang an chhawr ve theih nan an khuaah bank branch emaw, business correspondent emaw, Indian Postal Payment Bank emaw dah tura hma lakna kalpui mek a nih thu leh tun dinhmunah Lawngtlai District chhungah bank branch- 12, ATM booth -6, business correspondent- 84 leh Financial Literacy Centre- 1, a awm mek thu tar lan a ni a. October - December, 2024 inkar chhungin bank hrang hrang, Lead Bank leh CFL kal tlangin mipui hnena sum hman leh enkawl dan inzirtirna (financial literacy campaign) ṭum 97  buatsaih a nih thu tar lan niin, line department-te nena ṭang hovin bank-te'n FLC tam zawk buatsaih turin hma lak chhunzawm se, tih a ni.

Pawisa dah hmasa lo (zero balance)-a account hawn theihna, Pradhan Mantri Jan Dhan Yojana (PMJDY) leh social security scheme hrang hrang - Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY) etc. lama bank hma lak dan te thlir ho niin, mipui tam zawkin he'ng hamṭhatnate hi an chhawr theih nan ṭan lak lehzual ni se, tih a ni a. Bank-a mipuiin sum an dah luh (deposit) zat za zela bank-in mipuia sum an puktir (credit) zat chhutna, Credit/Deposit Ratio-ah Lawngtlai District-a bank-te chuan December 2024-ah CD Ratio 106.89% an nei tih tar lan niin,September  2024 (117.99%) nen khaikhinin CD Ratio hi 11.10 %-in a a tlahniam  a ni.

Kum 2024-2025  sawrkar kum chhunga Lawngtlai District chhunga bank-te'n loan an pek chhuah dan tur, Annual Credit Plan (ACP) ruahman atangin December,2024 thleng khan bank-te hian Priority Sector hnuaiah 51.43% leh Non- Proirity Sector hnuaiah 225.43 %  loan an pe chhuak tawh a ni. Ni 31, December 2024 thleng khan PMEGP hnuaiah loan nuai 16.75 hu pek niin, NRLM - ah nuai 234.26,  PMMY - ah nuai 327.73 leh KCC loan nuai 821.46  hu pek chhuah a ni bawk.

He hunah hian kum 2024-2025 chhunga Lawngtlai District chhunga bank-te'n loan an pek chhuah dan tur, Annual Credit Plan (ACP) ruahmanna an neih chu chu thlir ho a ni a. Bank leh mipui sum vawn himna (security) lam te leh pawisa leng vel (currency management & remittance) chungchang bakah Bank zawng zawngten quarter tawp atanga ni 15 chhung ngei a FLC data submit ni se tih an rel  a. Bank Branch zawng zawnga awm ngei ngei tur - Security Guards,  CCTV, Fire Extinguisher leh Security Alarm- te chu ngaihpawimawh thar ni se an ti bawk.