Lawngtlai District Election Officer Pu N. Chakhai MCS chuan Nimin khan Lawngtlaia chanchinbu mite a office chamber-ah kawmin, MLA Inthlanpui 2018 lo awm tur kaihhnawiha Lawngtlai District inbuatsaih dan leh media mawhphurhna te a sawipui.

Pu N. Chakhai chuan media-te'n ram leh khawtlang thatna tura an hna thawh pawimawhzia chu hmuh hmaih leh sawi nep theih a ni lo, a ti a. Tun Inthlanpui lo awm turah pawh a kutke pawimawh berte zinga mi tur an ni tiin, inthlan felfai leh muanawm taka kalpui a nih theih nana theih tawpa thawhpui turin a sawm nghal.

He inkawm khawmnaah hian Addl DC Pu Andrew Vanlaldika MCS leh DRDA Project Director Pu R. Lalremsanga MCS te pawh telin, chanchinbu mite nen hian inthlan chungchang thil pawimawh hrang hrang an sawi ho va. Inthlanpui hmachhawn turin Lawngtlai District chu a inpeih thawkhat tawh tih thu sawi lan a ni.

Tun MLA Inthlanpui atana September ni 27-a electoral roll tihchhuah taka a lan danin Lawngtlai District chhungah vote nei hmeichhia 40187 leh mipa 39933, an vaiin mi 80120 an awm a. He E/roll hi DEO hnwnah ni 15 chhung appel theih niin, tun thlengin appeal erawh dawn a la awm lo thung.

Lawngtlai District chhungah hian assembly constituency pathum awmin, 36-Tuichawng constituency-ah DRDA Project Director Pu R. Lalremsanga MCS chu Returning Officer (RO) a ni a, 37-Lawngtlai West-ah Bawrhsap Pu N. Chakhai MCS chu RO niin, 38-Lawngtlai East-ah Addl DC Pu Andrew Vanlaldika MCS chu RO a ni thung a. Inthlan kaihhnawiha hriat duh nei chuan constituency tina RO-te hi zawh theih reng an ni.

Lawngtlai District-ah hian polling station 161 awmin, hei hi sector 19-ah then a ni a. Critical polling station 9 leh vulnerable polling station 4 awmin, lawng hmanga pan ngai polling station 3 leh kea pan ngai 4 tun dinhmunah a awm mek bawk. Inthlan buaipui tur (polling official) 950 mamawh a ni dawn a, LMV 307, MMV 13 leh HMV 6, a vaiin lirthei 326 mamawh tura chhut a ni.