Nimin khan Lunglei DC Conference Hall ah Dr Ankita Chakravarty, District Election Officer hovin Political Party hrang hrang aiawh, media mite leh YMA hruaituten Election Model Code of Conduct leh Election Expenditure Monitoring chungchang an zir ho. He hunah hian Lunglei District huamchhunga Election kaihhnawih officials te an tel bawk.

Dr Ankita Chakravarty chuan inthlanna felfai leh thianghlim tak a awm theih nan kalkhawmte chu thawhho puiah a sawm a. Assembly Election 2018 hmachhawn turin inpuahchahna chak taka kalpui mek a nih thu sawiin Polling Station 185 leh Counting Hall tur ruamhan fel a nih tawh thu te, Flying Squad leh Video Surveillance team din an nih tawh thu te, Lunglei SP nen tawngkawpin security lama kawng hrang hranga hmalak a nih tawh thu te, election chungchanga complain neite tan District Complaint Monitoring System hnuaiah 24x7 Toll Free Number (0372-2322025) buatsaih a nih thu te, Service Voter ten awlsam zawka vote an thlak ve ngei theihna tura Electronically Transmitted Postal Ballot System siam a nih thu te leh pianphunga rualbanloten awlsam zawka vote an thlak ve theihna tura hmalak a nih thu te a tarlang.

Pu K.Lalrohlua, Project Director DRDA chuan Election Model Code of Conduct chungchangah zirtirna a pe a, Pu Benjamin Lalzama Additional DC chuan Election Expenditure Monitoring chungchangah zirtirna pe in, Election Expenditure Chart an duan chu a pharh a, sawifiah ngaite sawi fiahin an pawm nghal a ni. Pi C.Lalremruati, DIPRO chuan Media Certification and Monitoring chungchangah zirtirna pein Pi Lalchhanhimi SDC in E-Suvidha Portal chungchang ziritirna a pe bawk. Kalkhawmte atangin zawhna leh sawi hona hun tha tak hman a ni bawk a ni