Vawiin khan Lawngtlai District Development Co-ordination and Monitoring Committee (DISHA) chu an Chairman, Lok Sabha MP Pu CL Ruala leh Co-Chairman, Rajya Sabha MP Pu Ronald Sapa Tlau te hovin Lawngtlai DC Conference Hall-ah an thu khawm.

Chairman Pu CL Ruala chuan thu relte bawh zuia hmasawnna awm thin chu lawmawm a tih thu sawiin, hmasawnna nasa zawk a awm theih nan tan lak a tul thu a sawi a. Sawrkar laipui hma laknaa BPL chhungkuate hnena tlawm zawka gas connection pek hna pawh la kalpui chhoh tur a ni a, chu chu DISHA-in a la vil tur a ni, a ti a. Sawrkar hna thawkte chu district hmasawn nana hmanraw tha ber an ni tih hriaa theih tawp chhuaha hna thawk turin a chah.

Co-Chairman Pu Ronald Sapa Tlau pawhin DISHA chu district hmasawnna hna viltu pawimawh tak a ni tiin, member-te thawh hona tha tak atang chauhvin district hmasawnna tak tak chu a thleng thei dawn a ni, a ti a. Member-te chu thahnem ngai taka an ngaihtuahna seng turin a chah ve bawk.

He DISHA thut khawmah hian October ni 19, 2016-a DISHA thu rel bawh zui dan thlir ho a nih bakah, nikum October-December inkara Lawngtlai District chhunga hmasawnna hna hrang hrang thawh dan te thlir ho a ni a. Hna thawh tawha hlawhtlinna leh harsatna hrang hrang awmte sawi ho niin, a chin fel dan tur leh thawh zel dan tur ruahmanna leh rawtna te siam a ni.

DRDA kal tlanga hna thawh Mahatma Gandhi National Rural Employment Guarantee Scheme (MGNREGS) hnuaiah kum 2016-2017 chhungin Lawngtlai District-ah ni 16 inhlawhna siam a ni tawh a, ni 4 dang inhlawhna la awm leh tura beisei a ni. Kum 2016-2017 chhung atan Lawngtlai District pumpuiah Job Card 28163 pek chhuah a ni a. Anganwadi centre 10 leh inthiarna in 231 sak a ni tawh bawk.

Pradhan Mantri Krishi Sinchayee Yojana (PMKSY) hnuaiah Lawngtlai District-ah Project 17 awmin, he’ng project-te hi PIA-te’n an enkawl mek a. Pradhan Mantri Awaas Yojana-Gramin (PMAY-G) hnuaiah kum 2016-2017 chhung atana target beneficiary 1296 atangin beneficiary 574 tan in sakna tur sum 1st instalment pek tawh niin, beneficiary 101 tan 2nd instalment a chhuak leh mek bawk.

Social Welfare Department hnuaia National Social Assistance Programme (NSAP) kal tlangin tar pension (IGNOAPS) la mi 2032, hmeithai pension (IGNWPS) hmu mi 163 leh rualbanlo pension (IGNDPS) la mi 60 an awm mek a. Chhungkaw ei zawngtu ber thih vanga chhawmdawlna (NFBS), kum 3 chhung thla tin Rs 20000/- lak theihna tur pawh kalpui thuai tum a ni a. A theih ang angin a mamawhtute tuam kim zawk tura hma lak mek zel a ni.

Health Department hnuaiah Lawngtlai District-in hriselna lama hma a sawn theih nan hma lakna hrang hrang kalpui a ni a. Lawngtlai District chhungah October-December, 2016 chhung khan nausen thi 20 awmin, Infant Mortality Rate (IMR) chu 50 a ni a. Nu nau chunga thi 1 a awm bawk. RSBY hnuaiah inenkawlna senso cashless bill 55 leh reimburse bill 68 pek chhuah a ni.

PWD hnuaia Pradhan Mantri Gram Sadak Yojana (PMGSY) kal tlangin kawng 5 (km 40 chuang)-ah hna hrang hrang thawh mek a ni a. Diltlang-Chawngtelui kawng chu peih fel tawh niin, a dang pali chu thawh mek a ni.

Tun dinhmunah PHED hnuaia National Rural Drinking Water Programme (NRDWP)-ah Lunghauka-ah tui lak hna thawh zawh tawh niin, Dumzautlang leh Boraituli-ah te tui lak hna thawh mek a ni a; Swachh Bharat Mission (Gramin) hnuaiah ek in 1389 sak tawh niin, October hnu lamah sum awm loh vangin hma lakna thar a awm lo.

Midday Meal Scheme kal tlangin sikul naupang 26239 hnenah chawchhun pek a ni a. Chaw chhumtu 801 rawih mek an ni bawk. P&E Department hnuaia Deendayal Upadhyaya Gram Jyoti Yojana (DDUGJY) kal tlanga hna thawh tur erawh sum awm loh vangin thawh tan theih a la nih loh thu sawi a ni.

Vawiin thut khawmah hian Tuichawng bialtu MLA, Fisheries Minister Dr BD Chakma te, Lawngtlai DC Dr A. Muthamma IAS te, DRDA Project Director Pu R.Lalremsanga leh state leh LADC hnuaia hma sawnna hna thawktu department hrang hrang ai awh te, VC leh tlawmngai pawl ai awhte an tel a ni.