Vawiin khan Lawngtlai District Development Co-ordination and Monitoring Committee (DISHA) chu Co-Chairman, Rajya Sabha MP Pu Ronald Sapa Tlau hovin Lawngtlai DC Conference Hall-ah an thu khawm.

Pu Ronald Sapa Tlau chuan member-te chu meeting tura kan lo kal a, a ngai ang bawka kan haw leh chuan awmzia a awm dawn lo tih sawiin, hemi thut khawm atang hian kan chanpualah eng nge hmasawnna tur kan neih tih ngaihtuah a, tha zawka hna thawk zel tura kan rilru kan buatsaih a pawimawh a ni, a ti a. Kal khawmte chu District tana thahnem ngai taka thawk chhunzawm zel turin a chah.

Lawngtlai DC Dr A. Muthamma IAS chuan inlawmna thu sawiin, state danga DISHA meeting an neih mumal theih loh laia, Mizorama thla thum dana kan nei thei zel chu lawmawm a tih thu leh Chairman te inpekna fakawm a tih thu a sawi a. District dinhmun tlangpui leh tun hnaia hma lakna langsar te tarlangin, Mission Indradhanush hnuaia naupang hri danna pek kawnga hlawhtlinna te, kumin chhunga district chhung khaw tina eng luhtir tura hma lak mek te, naupang sikul kal lo leh sikul bang titlem tura hma lakna leh total literacy campaign atana khaw 20 tuam mek a nih thu te a tar lang.

He DISHA thut khawmah hian February ni 24, 2017-a DISHA thu rel bawh zui dan thlir ho a nih bakah, kumin January- March inkara Lawngtlai District chhunga hmasawnna hna hrang hrang thawh dan te thlir ho a ni a. Hna thawh tawha hlawhtlinna leh harsatna hrang hrang awmte sawi ho niin, a chin fel dan tur leh thawh zel dan tur ruahmanna leh rawtna te siam a ni. Kum 2016-2017 atana department hrang hrangin action plan an siam chu thlir ho a ni bawk.

DRDA kal tlanga hna thawh Mahatma Gandhi National Rural Employment Guarantee Scheme (MGNREGS) hnuaiah kum 2016-2017 chhungin Lawngtlai District-ah ni 34 inhlawhna siam a ni tawh a, ni 3 dang inhlawhna tur chu a chhuak leh tawh bawk. Tunah hian Lawngtlai District pumpuiah Job Card 29674 a awm mek a ni.

Pradhan Mantri Krishi Sinchayee Yojana (PMKSY) hnuaiah Lawngtlai District-ah Project 17 awmin, Project I & II hi March 2017 khan a tawp tawh a. Project dang 15 la kalpui mek a ni. Pradhan Mantri Awaas Yojana-Gramin (PMAY-G) hnuaiah kum 2017-2018 chhung atana target beneficiary 1766 atangin 1st phase-ah beneficiary 696 thlan phawt a ni.

He’ng bakah hian Social Welfare Department hnuaia National Social Assistance Programme chungchang te, P&E Department hnuaia Deendayal Upadhyaya Gram Jyoti Yojana (DDUGJY) chungchang te, PWD hnuaia Pradhan Mantri Gram Sadak Yojana (PMGSY) kawng 6 laih mek te, PHED hnuaia National Rural Drinking Water Programme (NRDWP) leh Swachh Bharat Mission (Gramin) te, zirna kaihhnawiha hma lakna hrang hrang te, Health Department hnuaiah Lawngtlai District-in hriselna lama hma a sawn theih nana hma lakna hrang hrang te sawi ho a ni.

Attachment

  • Loading attachment...