Nimin khan Khawlailung BNRGSK Hall-ah Integrated Sericulture Development Project (ISDP) leh Integrated Muga Silk Development Project (IMSDP) hnuaia an beneficiaries 36 te tan Sericulture Department Serchhip District buatsaihin training neih a ni.

He training-ah hian Pu BN Choudhary, Scientists- D, Central Silk Board (CSB), Pu Lalremsiama, Project Coordinator leh Pu Lalbiakhlua, SEO ten Project kalphung leh fuihna thu an sawi a, Dr. Lalthlamuana Pachuau, Scientists –C, Central Silk Board (CSB),  in hlawk taka Mulberry leh Muga pangang khawi dan chipchiar takin a zirtir bawk.

He training hi Pu V. Zothansanga, District Sericulture Officer chuan a kaihruai a. Pi S. Lalrintluangi, Extention Officer in Serchhip District chhunga project kalpui dante report a pe a, Pu C. Lalsawmliana, Sericulture Demonstrator, Khawlalilung Circle chuan Central Silk Board leh Directorate Office-a Project Cell hotuten training neia an tlawh chu lawmawm a tih thu a sawi bawk.

Training zawhah tanpuina an dawng atanga an hmalakna hrang hrang-  pangang chaw hmun te, pangang khawina in tur an sak te leh  thlam an sakte chu a hmunah kalin an fang kuala, Central Silk Board a Scientists te hian Khawlailung khaw hmalakna chu fakawm an tih thu leh tum dangah pawh training la neihpui leh zel an inhuam thu an sawi a ni.