794/2022-2023
Nikir thla ni 6, 2022: Vawiin khan Lawngtlai District AIDS Prevention and Control Committee (DAPCC) chu an Chairman, Lawngtlai Bawrhsap Pu Amol Srivastava hovin Lawngtlai DC Conference Hall-ah an ṭhu khawm a. He hunah hian Lawngtlai khawpui chhunga kohhran ṭhalai, tlawmngai pawl, VC Association, zirlai pawl leh zirna in ai awhte, chanchinbu mi leh HIV/AIDS dona kawnga thawktu hrang hrangte pawh sawm tel an ni.


Bawrhsap Pu Amol Srivastava chuan Lawngtlai District-a HIV/AIDS darh zel chu ngaihmawh a ṭul tak zet tih sawiin, HIV/AIDS darh zel tur ven nan sawrkar department, kohhran, tlawmngai pawl leh mipuite ṭan rualna leh thawh hona a pawimawh thu a sawi a. Damdawi hman sual leh mipat hmeichhiatna hman khawloh aṭanga darh a tam ber avangin ṭhalaite hnena nun kawng dik kawhhmuh chu hma lakna tur pawimawh tak nia a hriat thu a sawi.

Additional Deputy Commissioner Pu James Miahlung chuan ṭhut khawm koh chhan sawi fiahin, thu ngaihtuah turte a chhawp chhuak a. District AIDS Control Officer (DACO) Dr S. Thaizi hnen aṭangin Lawngtlai District dinhmun ngaihthlak a ni a. Lawngtlai District-in harsatna a tawh hrang hrangte tar lan niin, a chin fel dan tur rawtna te, HIV/AIDS darh zel tur venna atana hma lakna tur kawng hrang hrang te, District dinhmun hriat chian lehzual nana endikna kalpui tam lehzual theih dan tur te, HIV hrik pai nuin a naupaia a kai chhawng tur ven nana hma lakna tur te, mipui nawlpui leh HIV/AIDS kai mai hlauhthawnawm dinhmuna dingte zinga zirtirna kalpui zel dan tur leh hmachhawp hrang hrangte he hunah hian sawi ho a ni.

DACO report-a a lan danin, April 2019 - March 2020 chhungin Lawngtlai District-a general client 1,266 endik aṭangin HIV positive 31 hmuh chhuah an ni a, nu naupai 1,265 endik aṭangin positive 3 hmuh chhuah an ni bawk. April 2020 - March 2021 chhungin Lawngtlai District-a general client 1,864 endik aṭangin HIV positive 51 hmuh chhuah niin, nu naupai 1,376 endik aṭangin positive 6 hmuh chhuah an ni bawk a. April 2021 - March 2022 chhungin Lawngtlai District-a general client 2,175 endik aṭangin HIV positive 58 hmuh chhuah niin, nu naupai 1,535 endik aṭangin positive 9 hmuh chhuah an ni bawk. Report-ah hian tun hnaia Lawngtlai District chhunga positive hmuh chhuah zingah damdawi ruih theih hmanga inchiu ṭhin an tam ber thu tar lan a ni.

Kum 2018 - 2022 chhung data aṭanga mihring kum bi-a hri kai hmuh chhuah tam lam chu:

Kum 0 - 14 inkar 5,
Kum 15 - 24 inkar 27,
Kum 25 - 34 inkar 84,
Kum 35 - 49 inkar 45,
Kum 50 chung lam 5 a ni.

Attachment

  • Loading attachment...