795/2022-2023
Nikir thla ni 6, 2022: Vawiin khan Lawngtlai District Level Task Force on Implementation of COTPA chu an Chairman, Lawngtlai Bawrhsap Pu Amol Srivastava hovin Lawngtlai DC Conference Hall-ah an ṭhu khawm a. Lawngtlai District chhunga vaihlo khuahkhirhna dan, Cigarettes and Other Tobacco Products Act (COTPA), 2003 kenkawh kawnga hma lak dan tur hrang hrang an sawi ho.

Additional Deputy Commissioner Pu James Miahlung chuan ṭhut khawm koh chhan sawi fiahin, thu ngaihtuah turte a chhawp chhuak a. National Tobacco Control Programme (NTCP), Lawngtlai District-a Social Worker Pi H. Vanlalmuansangi chuan Lawngtlai District-a NTCP hma lakna report a pe a. Report-a tar lan a nih dan chuan, kum 2016 April aṭanga kum 2022 May thla chhungin Lawngtlai District-a vaihlo leh a kaihhnawih hmang ṭhin, sim duha NTCP Tobacco Cessation Clinic pan mi 2,353 an awm a. An zinga mi 1,404 (59.66%)-in an sim a ni. Hemi chhung hian school 183 leh Kohhran/vantlang thiltihna hmun 60-ah vaihlo ṭhat lohzia zirtirna awareness campaign buatsaih niin, Anti-Tobacco Squad leh pawl hrang hrang hnenah ṭum 81 training huaihawt a ni bawk.

Lawngtlai khawpui chhungah April 2016 - May 2022 chhungin danin a phal loh meizial (cigarette) zuar endik leh phal lohna hmuna mei zu vaiin, squad drive ṭum 385 buatsaih niin, hmun 2,183 tlawh a ni a. Dan bawhchhia 579 man niin, pawisa chawitir zat tling khawm chu ₹ 35,170 a ni.

Vawiin ṭhut khawmah hian phal lohna hmuna mei zu vai tura anti-tobacco squad drive kalpui dan tur te, sumo khalhtute hnena vaihlo ṭhat lohzia leh COTPA danin puipunna hmuna mei zuk a khap thu hrilhfiah nana awareness programme buatsaih chungchang te, Sangau Sub-Division huam chhunga anti-tobacco squad din dan tur te, CYLA khelmual leh sawrkar office building-a mei zuk phal loh thu hriattirna tar chungchang te, Tobacco Cessation Clinic tana CO2 monitor lei chungchang leh COTPA kenkawh chungchanga hma lakna tur kawng hrang hrangte sawi ho a ni.