No.752021-2022

Lawngtlai, Tomir thla ni 31, 2021: Vawiin khan Lawngtlai District Level Task Force on COVID-19 (DLTF) chu an Chairman, Lawngtlai Bawrhsap Dr Andrew H. Vanlaldika hovin Lawngtlai DC Conference Hall-ah an thu khawm a. COVID-19 hri leng laka him nana state sawrkar ruahmanna zulzuia Lawngtlai District chhunga chawlhkar khat (31.05.2021 - 07.06.2021) chhunga inkhuahkhirhna kalpui dan tur an rel.

Chairman, Dr Andrew H. Vanlaldika chuan COVID-19 hri leng a la ziaawm theih loh avangin inthlahdah a rem lo tih sawiin, DLTF member leh COVID-19 dona leh venna kawnga hma latute chu theih tawp chhuah zel tur leh District mipuite pawh COVID-19 laka him tura fimkhurna tur inkaihhruaina hrang hrang leh sawrkarin dan a zamte thu awih taka zawm zel turin a chah.

DLTF Member Secretary, Lawngtlai District Chief Medical Officer Dr LP Malsawma chuan COVID-19 hri leng kaihhnawiha Lawngtlai District dinhmun tlangpui a tar lang a. Tun dinhmunah Lawngtlai District chhungah COVID-19 positive (active case) mi 242 an awm mek thu leh DCHC, CCC, 4C leh Home Isolation-ah te enkawl an nih thu a sawi.

He DLTF thut khawmah hian COVID-19 hri leng tiziaawm tura hma lak dan tur leh inkhuahkhirhna kalpui chhunzawm dan tur zau taka sawi ho a ni a. Lawngtlai District chhungah June ni 7, 2021 (Thawhtanni) zing dar 4:00 thleng awmze neia inthlah zalen chungin, khauh taka inkhuahkhirhna kalpui chhunzawm ni se, tih a ni.

DLTF thu khawm chuan hemi hun chhung hian zan dar 7:00 atanga a tuk zing dar 4:00 thleng zan tin pawn chhuah khap bur (curfew) chu chhunzawm tha an ti a. Sawrkar office-te chu lockdown hmasaa an kal dan pangngai angin, a pawimawh zual chauh office kai a, a bakin in lam atanga hna thawh chu kalpui chhunzawm ni se, an ti.

Auto rickshaw leh taxi te chu awmze neia an tlan remtih a ni a. An dinna leh tlan dan turah veng tin VLTF-te'n ruahmanna siam tura tih niin, khualzin phur maxi cab-te erawh Mizoram puma inkhuahkhirhna kalpui mek angin an tlan a la rem dawn rih lo a ni.

Kut hna thawh chungchangah khawpui chhungah hna tul zual bikte chu VLTF-te hriatpui leh remtihnain COVID-19 laka him nana sawrkarin fimkhurna tur inkaihhruaina a siam (COVID-19 Appropriate Behaviour) te zawm chungin thawh phal a ni dawn a, hmun khatah mi panga aia tam hna thawh ho erawh khap niin, panga aia tam thawh tul bikah chuan thuneitute hnen atangin zonal officer kal tlangin phalna lak a ngai dawn a ni. Khawpui pawna kut hna thawka chhuak turte pawh VLTF-te hriatpuina leh remtihna lehkha nen an luh leh chhuah remtih a ni.

Mipui leh sumdawngte'n inkhuahkhirhna avanga an tuar lutuk loh nan chawhmeh zawrhna leh dawr dangte chu thlah zalen hret tha tih a ni a. Thlai hnah leh chawhmeh zuarte chu mahni veng theuhvah an inpho remtih niin, Bazar Veng leh Chandmary bikah chuan zing dar 5:00 atanga zing dar 10:00 thleng an inpho remtihsak an ni a. Dawr dangte chu chawhma dar 10:30 atanga tlai dar 4:00 thleng an inhawn remtih a ni. He'ng dawrah te hian COVID-19 laka him nana sawrkarin fimkhurna tur inkaihhruaina a siam (COVID-19 Appropriate Behaviour) hrang hrang, mask vuah, social distancing vawn that, dawr chhunga dawrtute luhtir loh, dawrtute chhinchhiahna tha taka vawn leh hand sanitiser hman te tha taka zawm tur a ni ang a. Mahni veng VLTF lehkha neite chauhin thil an lei thei dawn bawk a ni.

Dawr hawn, hna thawh leh auto rickshaw/taxi service te phal a nih avang hian mipui inkhuahkhirhna thah zalen a ni ta tihna a ni lo va. State sawrkarin Mizoram puma inkhuahkhirhna thupek a chhuah, clause A.7.1 angin, "Hemi hun chhung hian eizawnna leh tul bik thil ni lova veivah leh inlen pawh khap tlat a ni" a. Eizawnna leh tul bik thila chhuah ngaite chuan mahni veng VLTF-te hriatpuina lehkha an lak zel a ngai dawn a. Police, Executive Duty leh VLTF-te khauh taka duty-in, inkhuahkhirhna zawm lo leh COVID-19 laka himna tura sawrkarin dan a siamte bawhchhia chu dan angin an hrem zel dawn a ni.

Lawngtlai District chhunga inkhuahkhirhna kalpui dan tur kimchang chu Deputy Commissioner-in a la tichhuak dawn a ni.